Քաղաքագետը խորհրդարանական չորս խմբակցությունների քայլերն ապարդյուն է համարում

Ազգային ժողովի ոչ իշխանական չորս ուժերի նախաձեռնությունը' խորհրդարանական հերթական նիստի ժամանակ անվստահություն հայտնել կառավարությանը, որևէ արդյունք չի ունենա: «Կովկաս» ինստիտուտի փոխտնօրեն, քաղաքագետ Սերգեյ Մինասյանի գնահատմամբ' դա գործունեություն է գործունեության համար, քանի որ խորհրդարանում առանց կոալցիոն գործընկեր «Օրինաց երկրի» էլ, Հանրապետական կուսակցությունը մեծամասնություն է: «Իսկ ՀՀԿ-ն հայտարարել է, որ շարունակում է վստահել վարչապետին և կառավարությանը: Հետևաբար, սա գործընթաց է գործընթացի համար. ոչ մի լուրջ տեղաշարժ չի կատարի և արդյունք չի ունենա»,-լրագրողների հետ հանդիպման ժամանակ ասաց Սերգեյ Մինասյանը:

Քաղաքագետն ուշադրություն է հրավիրում այն հանգամանքին, որ քաղաքական չորս ուժերը միմյանցից խիստ տարբեր գաղափարախոսություն ունեն և հենց դա է բերում անիրատեսական հնարավորությունների: Նրա խոսքով` այս կերպ քաղաքական ուժերը փորձում են ցույց տալ, որ դեռևս գոյություն ունեն և քաղաքական դաշտի մի մասնիկն են:

ԱԺ ոչ իշխանական չորս ուժերը' ՀՅԴ, ԲՀԿ, ՀԱԿ, «Ժառանգություն», հայտարարել են ԱԺ առաջիկա նստաշրջանի ժամանակ կառավարությանը անվստահություն հայտնելու նախաձեռնության մասին: Միաժամանակ, նախորդ ուրբաթ ՀՀԿ ԳՄ նիստից հետո ԱԺ փոխնախագահ Էդուարդ Շարմազանովն ասաց, որ իրենց կուսակցության օրակարգում վարչապետին և կառավարությանն անվստահություն հայտնելու հարց չկա: