ԱԺ նախագահը մեծ ձեռքբերում է համարում Հայաստան - Մեծ Բրիտանիա Առևտրի պալատի ստեղծումը

ՀՀ Աժ նախագահ Հովիկ Աբրահամյանն ընդունել է Միջխորհրդարանական միությունում բրիտանական խմբի պատվիրակությանը Ջոն Ուիթինգդեյլի (ՄԹ Համայնքնեի պալատ) գլխավորությամբ: Պատվիրակության կազմում են ՄԹ Լորդերի պալատի փոխնախագահներ բարոնուհի Գլորիա Հուփերը, լորդ Ռիչարդ Ֆոլքները, Համայնքների պալատի անդամներ Սթիվեն Փաունդը և Մայք Գեյփսը:

Ողջունելով հյուրերին` ԱԺ նախագահը գոհունակությամբ փաստել է, որ վերջին 2 տարիների ընթացքում Հայաստանի և Մեծ Բրիտանիայի միջև արձանագրվել է երկկողմ քաղաքական շփումների ակտիվացում և համագործակցությունը երկու երկրների միջև զգալի վերընթաց է ապրել բազմաթիվ ոլորտներում:

Նրա խոսքով` Հայաստանը կարևորում է Միացյալ Թագավորության հետ երկկողմ և բազմակողմ հարաբերությունների զարգացումը և բարձր մակարդակի քաղաքական երկխոսության ակտիվացումը: Աժ նախագահը կարևորել է հայաստանյան բազմաթիվ ծրագրերում ՄԹ կառավարության ու հասարակական կազմակերպությունների ներգրավվածության փաստը և ձեռքբերում է համարել Երևանում Հայաստան-Մեծ Բրիտանիա Առևտրի պալատի ստեղծումը: Հայ-բրիտանական միջպետական համագործակցության զարգացման և ընդլայնման գործում Հովիկ Աբրահամյանը, առանձնահատուկ դեր վերապա հելով օրենսդիր մարմինների միջև հարաբերությունների զարգացմանը, նշել է.« Մենք կարևորում ենք Հայաստանի և Մեծ Բրիտանիայի միջև միջխորհրդարանական համագործակցությունն այն համոզմամբ, որ խորհրդարանական դիվանագիտությունը երկրների միջև քաղաքական երկխոսությունն առաջ մղելու կարևոր լծակներից է: Մենք շահագրգիռ ենք խթանելու միջխորհրդարանական փոխգործակցությունը»:

Ներկայացնելով տարածաշրջանային զարգացումները` Հովիկ Աբրահամյանն անդրադարձել է ղարաբաղյան հիմնախնդրի կարգավորմանը, հայ-թուրքական հարաբերություններին և կարևոր համարել միջազգային ասպարեզում դրանց վերաբերյալ օբյեկտիվ կարծիք ձևավորելու անհրաժեշտությունը: «Ադրբեջանի կողմից սանձազերծված ու տարեցտարի ավելի ուժգնացող սպառազինությունների կուտակումը լուրջ սպառնալիք է ոչ միայն Հարավային Կովկասի, այլև ողջ տարածշրջանի անվտանգության և կայունության համար: Հաշվի առնելով հակամարտության կարգավորման բարդ գործընթացը` կարևոր նշանակություն ունի միջազգային հանրության տարածաշրջանի երկրների հանդեպ հավասարակաշռված և անկողմնակալ դիրքորոշումը»,-ասել է ԱԺ նախագահը:

Անդրադառնալով Հայոց ցեղասպանության 100-ամյա տարելիցին` Հովիկ Աբրահամյանը նշել է, որ Հայաստանը բարձր է գնահատում Միացյալ Թագավորության խորհրդարանում գործող Բրիտանահայկական համակուսակցական խորհրդարանական խմբի նախաձեռնությունները: Նա շնորհակալություն է հայտնել Սթիվեն Փաունդին փետրվարի 11-ին ՄԹ Համայնքների պալատում ելույթի համար, որտեղ նա անդրադարձել և անաչառ գնահատակ էր տվել Լեռնային Ղարաբաղի հակամարտությանը և Հայոց ցեղասպանությանը:

Հայաստանի Մաքսային միությանն անդամակցելու որոշմանը անդրադառնալով` ԱԺ նախագահը նշել է, որ այն բխում է մեր երկրի շահերից և պայմանավորված է աշխարհաքաղաքական իրողություններով: Նրա խոսքով` այդ որոշումը ամենևին չի նշանակում Եվրոպական միության հետ քաղաքական երկխոսության դադարեցում: «Հայաստանը կարևորում է Եվրոպական միության հետ բազմաբնույթ համագործակցությունը և փոխհարաբերությունները, որոնք հիմնված են ընդհանուր ժողովրդավարական արժեքների, մարդու իրավունքների և օրենքի գերակայության վրա», – նշել է Հովիկ Աբրահամյանը:

Շնորհակալություն հայտնելով ընդունելության համար` ՄՄ Բրիտանական խմբի պատվիրակության ղեկավար Ջոն Ուիթինգդեյլը համոզմունք է հայտնել, որ խմբի պաշտոնական այցը Հայաստան կնպաստի հայ-բրիտանական կապերի զարգացմանը և խորացմանը: Նրա խոսքով, Հայաստանը մեծ թվով բարեկամներ ունի ՄԹ խորհրդարանում, ինչին մեծապես նպաստել է Հովիկ Աբրահամյանի 2011թ. աշխատանքային այցը Մեծ Բրիտանիա: Համայնքների պալատի անդամ Սթիվեն Փաունդը նշել է. «Դուք Բրիտանիայի խորհրդարանում մեծ թվով բարեկամներ ունեք, ովքեր Հայաստանի կողքին են և մտահոգված են նրա խնդիրներով: Հայաստանի ձայնը լսելի է Բրիտանիայի խորհրդարանում: Մենք ուզում ենք, որ Հայաստանում լինի կայունություն և առաջընթաց»: Բրիտանացի խորհրդարանականները ևս կարևորել են երկու խորհրդարանների միջև համագործակցության խորացումը, երկկողմ շփումների ակտիվացման անհրաժեշտությունը: Կարևոր է համարվել տնտեսական հարաբերությունների հետագա զարգացումը, ինչպես նաև փոխգործակցությունը տարբեր ոլորտներում:

Հանդիպման ընթացքում քննարկվել են այլ հարցեր ևս, երկուստեք կարևորվել է տարածաշրջանի կայունությունը և խաղաղությունը, հակամարտությունների խաղաղ կարգավորումը: