«Նրանց տուն է պետք». Բացվեց Գյումրու` երկրաշարժից փրկվածների առօրյան ներկայացնող լուսանկարների ցուցահանդես

Գյումրու 1988 թվականի երկրաշարժից փրկվածների ներկայիս վիճակն արտացոլող երկու տասնյակից ավելի լուսանկարներ մինչև մարտի 5-ը կզարդարեն ՄԱԿ-ի հայաստանյան գրասենյակը: Երիտասարդ լուսանկարիչ Հայկ Բարսեղյանի «Նրանց տուն է պետք» խորագրով լուսանկարների ցուցահանդեսը նվիրված է կործանարար երկրաշարժի հետևանքով արդեն քսանհինգ տարի սոցիալական անդունդի հատակում հայտնված և տնակային պայմաններում բնակվող գյումրեցիների կյանքին ու գոյատևման պայքարին: Այն նպատակ ունի ինչ-որ կերպ լուծում տալ խնդրին և նվազեցնել աղքատությունը: Միջոցառումը նախաձեռնել են ՄԱԿ-ի հանրային տեղեկատվության վարչության հայաստանյան գրասենյակը և «Հայկական Կարիտաս» բարեգործական ՀԿ-ն: Այն մեկնարկեց փետրվարի 18-ին երկրաշարժը խորհրդանշող ժամին` 11:41-ին:

«Նախաձեռնությունը ծնվեց այն պատճառով, որ երկրաշարժից անցել է հենց 25 տարի: «Հայկակական Կարիտասը» պարբերաբար կապի մեջ է և աշխատում է այն մարդկանց հետ, ովքեր ապրում են աղքատության պայմաններում: Տնակային պայմաններում ապրող մարդիկ ծայրահեղ աղքատ են, և դա մեզ համար բավականին ծանր է: Երբ տեսանք Հայկ Բարսեղյանի լուսանկարները, հասկացանք, որ կարելի է ՄԱԿ-ի միջոցով հանրությանը իրազեկել Գյումրիի այսօրվա իրավիճակի մասին: Գյումրիում տնակներում ապրող մարդիկ բավականին մեծ թիվ են կազմում: Շատ մեծ գումարներ են անհրաժեշտ նրանց բնակարաններով ա պահովելու համար: Այս հարցը լուծելու համար անհրաժեշտ է նաև պետական քաղաքականություն»,- նշեց «Հայկական Կարիտաս» ՀԿ գործադիր տնօրեն Անահիտ Մխոյանը:

Գյումրիում ապրող լուսանկարիչ Հայկ Բարսեղյանն ասաց, որ այցելել է տնակային պայմաններում ապրող 16 ընտանիքների և ցուցահանդեսին ներկայացրել 25 լուսանկար: Լուսանկարներն ստեղծել է նախորդ տարի' հենց դեկտեմբերին:

«Ամեն անգամ տխրում էի, տեսնելով այդ ամենը, քանի որ մեծացել եմ հենց այդ իրականության մեջ»,-նշեց Բարսեղյանը:

ՄԱԿ-ի հանրային տեղեկատվության վարչության ներկայացուցիչ Մարիա Դոցենկոն նշեց, որ մինչև տարեվերջ նախատեսված է կազմակերպել ևս մեկ ցուցահանդես, որտեղ կներկայացվեն այն փոփոխությունները, որոնք գուցե եղած լինեն տնակային պայմաններում ապրող գյումրեցիների կյանքում:

Հայկ Բարսեղյանը կշարունակի լուսանկարել աղքատ գյումրեցիներին և կփորձի իր լուսանկարներով ինչ-որ բան փոխել:

Այսօր Գյումրիում ժամանակավոր տնակներում ապրում են 4000 ընտանիք: