Հայաստանում կբազմացվի խաղողի վարդագույն քիշմիշ սեղանի սորտը

Հայաստանում 2014 թվականին կիրականացվեն խաղողի սեղանի սորտերի մշակման աշխատանքներ՝ հատուկ այդ նպատակով հիմնված տնկարանում: Մշակված սորտերը հետագայում կտրամադրվեն գյուղացիական տնտեսություններին: Այս մասին փետրվարի 18-ին, Արարատի մարզպետարանում կայացած խորհրդակցությանը նշեց ՀՀ գյուղատնտեսության նախարար Սերգո Կարապետյանը:

Նրա խոսքով` Հայաստանում խաղողի սեղանի սորտերը շատ քիչ են. շուրջ 87-88 տոկոսը տեխնիկական սորտերն են, որոնք գյուղացիական տնտեսությունները վաճառում են համեմատաբար էժան: «Մենք արդեն ստեղծել ենք տնկարանային տնտեսություն, որն այս տարի արդեն կսկսի աշխատել: Այդտեղ մշակելու և բազմացնելու ենք խաղողի սեղանի սորտեր՝ հատկապես վարդագույն քիշմիշը, և գյուղացիական տնտեսություններին տրամադրելու ենք այն մշակության համար»,- ասաց Կարապետյանը՝ հավելելով, որ նպատակ է դրված առաջիկա 5 տարիներին Հայաստանում ստեղծել 5 հազար հեկտար քիշմիշային սորտերի այգիներ: Նախարարն անհրաժեշտ է համարում, որ գյուղացիական տնտեսությունները մշակեն ավելի եկամտաբեր մշակաբույսեր:

ՀՀ գյուղատնտեսության նախարարության տվյալներով՝ Հայաստանում պտուղ-բանջարեղենի և խաղողի մթերումների ծավալը 2013 թվականին նախորդ տարվա համեմատ աճել է շուրջ 4.2 տոկոսով և կազմել 224 հազար տոննա: Խաղողի բերքը 2013 թվականին կազմել է շուրջ 241 հազար տոննա: