Մինաս և Նարեկ Ավետիսյանների աշխատանքները` մեկ ցուցահանդեսում

Ս. թ. փետրվարի 21-ից մայիսի 4-ը Գերմանիայի Մորիցբուրգ-Սաքսոնիա-Անհալթ երկրամասի արվեստի թանգարանում կկայանա «Մինաս և Նարեկ Ավետիսյան. մոդեռնը և ավանգարդը Հայաստանում» լայնածավալ ցուցահանդեսը: Ցուցահանդեսի հանդիսավոր բացումը տեղի կունենա փետրվարի 20-ին:

Ցուցահանդեսի շրջանակում կցուցադրվեն Մինաս Ավետիսյանի 19 /Հայաստանի Ազգային պատկերասրահի, Մինաս Ավետիսյանի ընտանիքի, Ռուսական արվեստի թանգարանի և Մայր Աթոռ Սուրբ Էջմիածնի թանգարանի հավաքածուներից/ և որդու՝ Նարեկ Ավետիսյանի 9 ստեղծագործություններ: Այսպիսով, գերմանացի արվեստասեր հանրությանը կներկայացվեն Մինաս Ավետիսյանի ստեղծագործական գործունեության տարբեր փուլերը, միևնույն ժամանակ հնարավորություն կընձեռվի ծանոթանալու Նարեկ Ավետիսյանի «Ինտերֆրակտալներ» /2008-2010 թթ./ շարքին: Ցուցահանդեսի շրջանակում Մինաս և Նարեկ Ավետիսյանների աշխատանքներն առաջին անգամ կցուցադրվեն միասին:
20-րդ դարի երկրորդ կեսի հայ արվեստի ականավոր ներկայացուցիչներից մեկը և նրա որդին՝ յուրաքանչյուրն իր արվեստի միջոցով ներկայացնում են հայ գեղանկարչության զարգացումը՝ սերունդներ կամրջող երկխոսության տեսքով:

Հրատարակվել է նաև ցուցահանդեսի ընդգրկուն, եռալեզու պատկերագիրքը /գերմաներեն, հայերեն և անգլերեն/: Պատկերագրքում զետեղված է արվեստագիտության դոկտոր, պրոֆեսոր Վիլհեմ Շլինկի արվեստաբանական հոդվածը, որն անդրադառնում է Մինաս Ավետիսյանի արվեստին, ինչպես նաև Նարեկ Ավետիսյանի բացառիկ և ընդգրկուն հարցազրույցը արվեստագիտության թեկնածու Մարի-Քրիստին Ֆրիտչի հետ: