Աշխարհում ամենաթանկ iPhone-ը առաջարկվում է 16,7 մլն դոլարով

Աշխարհում ամենաթանկ iPhone-ը՝ զարդարված ոսկով եւ ադամանդներով, շուկա է հանվել 16,7 միլիոն դոլարով, հաղորդում է Հոնկոնգի «Վենհուեյ բաո» թերթը:

Խոսքը վերաբերում է iPhone 5 Black Diamond սմարթֆոնին, որի դիզայնն անցյալ տարի մշակել է բրիտանացի Սթյուարտ Հյուզը հոնկոնգցի ոմն գործարարի բացառիկ պատվերով: Իսկ այժմ այս մոդելը կստանա սերիականի կարգավիճակ եւ բոլոր ցանկացողներին «մատչելի» կլինի բրիտանացի ոսկերչի պաշտոնական կայքում:

Հեռախոսի կորպուսը պատրաստված է 24 կարատ ոսկուց եւ դրվագազարդված է 600 ադամանդներով, եւս 53 թանկարժեք քար օգտագործվել է «խնձորի» լոգոտիպի ստեղծման համար, իսկ առջեւի պանելը պատրաստված է շափյուղյա ապակուց: «Տուն» կոճակին փոխարինել Է 26-կարատանոց խոշոր սեւ ադամանդը:

Լիվերպուլցի դիզայների խոսքով՝ հեռախոսի ստեղծման գործընթացն իրենից պահանջել է 9 շաբաթ: Առաջին պատվիրատուի վրա, որը գերադասել է չհայտնել իր անունը, սմարթֆոնը նստել Է 15,3 միլիոն դոլար:

Ինչպես նշում է ԻՏԱՌ-ՏԱՍՍ-ը, Հյուզի ընկերությունն առաջարկում է նաեւ iPhone-ի ավելի «հասարակ» տարբերակներ՝ կատարված ոսկուց: Դրանց արժեքը չափվում է տասնյակ հազարավոր դոլարներով: