Արևմտյան Հայաստանի բոլոր գավառների ճարտարապետությունը կամփոփվի 36 հատորից բաղկացած մատենաշարում

Գիտություն և Մշակույթ 20 Փետրվար, 2014 10:54

Ճարտարապետի, քարտեզագրի, համակարգչային և այլ մասնագետների համակարգված և մանրակրկիտ աշխատանքի արդյունքում 2015 թվականին' Հայոց ցեղասպանության 100-ամյա տարելիցին ընդառաջ ընթերցողի դատին կհանձնվի նոր մատենաշար, որը ներկայացնելու է Արևմտյան Հայաստանի գավառները 36 հաստափոր հատորներով: «Արմենպրես»-ի թղթակցի հետ զրույցում «Հայկական ճարտարապետությունն ուսումնասիրող հիմնադրամի» ղեկավար Սամվել Կարապետյանը պատմեց, որ մոտ 70 գավառներից առաջինը անդրադարձ է կատարվելու Հայոց Ձոր գավառին, որը գտնվում էր Մեծ Հայքի Վասպուրական նահանգի կազմում: Մատենաշարում անդրադարձ կկատարվի շուրջ 7000 գյուղերի' ըստ գավառների:

«Առաջին հատորն ընթացի մեջ է, այժմ աշխատում ենք դրա վրա: Այն խորհրդանշական է, որովհետև Հայկ Նահապետը' առաջին հայ մարդն իր առաջին ճակատամարտից հետո իր տունը հենց Հայոց Ձոր գավառում է հիմնել: Այդ պատճառով մեր առաջին հատորն այս գավառին է նվիրված»,- նշեց Կարապետյանը:

Նրա խոսքով՝ դեռևս անորոշ է ահռելի աշխատանք ենթադրող մատենաշարի տպագրական ծախսերի խնդիրը:

«Կարծում եմ, որ սա այն մատենաշարն է, որ եթե հովանավոր չգտնվի, մենք բաժանորդագրություն կիրականացնենք, և հույս ունեմ, որ գոնե այս ճանապարհով կկարողանանք տպագրել»,- ընդգծեց հուշարձանագետը:

Ստեղծագործական թիմը ողջ մատենաշարի ավարտի համար նախանշում է 8-10 տարվա աշխատանք' 2015-ի համար ծրագրելով առաջին հատորի լիարժեք ավարտը, և մյուս երկու հատորների աշխատանքի մեկնարկը:

Պատասխանելով «Արմենպրես»-ի հարցին' «Հայկական ճարտարապետությունն ուսումնասիրող հիմնադրամի» ղեկավարը կարծիք հայտնեց, որ այս մատենաշարը տարբեր հասցեատերեր ունի. մասնագետ ճարտարապետներ, պատմաբաններ, հայագիտության տարբեր ոլորտների ներկայացուցիչներ:

«Յուրաքանչյուր հատոր ներկայացնում է տվյալ գավառի տարածքում գտնվող բոլոր գյուղերը մեկ առ մեկ, հետևաբար այն կներկայացնի մեր հայրենիքի բոլոր գյուղերը և առնվազն մեկ ու կես միլիոն նահատակների ծննդավայրերը»,-պարզաբանեց մասնագետն' ավելացնելով, որ մատենաշարը Հայոց ցեղասպանության անմեղ նահատակների հիշատակին մատուցվող հարգանքի լավագույն տուրքն է:

Առաջիկայում նախաձեռնողները նպատակ ունեն, որպեսզի մատենաշարի յուրաքանչյուր հատոր ունենա նաև այդ գավառը ներկայացնող ֆիլմ, որը սակայն չի կրկնի այն, այլ կլինի նորովի մատուցմամբ:

Յուրաքանչյուր հատորում պատմական Հայաստանի գավառները կներկայացվեն ոչ միայն տեքստային տարբերակով, այլև 1000-1500 լուսանկարների և քարտեզների միջոցով:

Տաթևիկ Գրիգորյան