Սերժ Սարգսյանը ներկա էր երևանյան նոր բժշկական կենտրոնի բացմանը

Այցելուների առաջ իր դռները բացեց նոր, ժամանակակից սարքավորումներով հագեցած «Սլավմեդ» բժշկական կենտրոնը, որի բացման արարողությանը փետրվարի 20-ին ներկա էին ՀՀ Նախագահ Սերժ Սարգսյանը, Երևանի քաղաքապետ Տարոն Մարգարյանը, բարձրաստիճան այլ պաշտոնյաներ: Լրագրողների հետ զրույցում Առողջապահության նախարար Դերենիկ Դումանյանը նշեց, որ բժշկական այս կենտրոնը ստեղծվել է մասնավոր ներդրման արդյունքում: «Այստեղ բավականին մեծ դրամական միջոցներ են ներդրվել' շուրջ 5 միլիարդ դրամ: Կենտրոնը լինելու է բազմապրոֆիլ, այստեղ գործելու են վիրաբուժական ծառայություններ, սկսած ընդհանուր վիրաբուժությունից մինչև ուրոլոգիական, պլաստիկ, վերականգնողական, վնասվածքաբանական ծառայություններով, ինչպես նաև գործելու են ծննդատուն, մանկաբարձական և գինեկոլոգիական բաժիններ»,-ներկայացրեց Դումանյանը:

«Սլավմեդ բժշկական կենտրոնի» հիմնադիր-տնօրեն Արմինե Հովակիմյանը, ով մասնագիտությամբ սրտաբան է, նշեց, որ միշտ մեծ է եղել բժշկական կենտրոն հիմնելու իր ցանկությունը: Նրա խոսքով, կենտրոնի հիմնադրումը նպատակ ունի Հայաստանի հիվանդանոցային համակարգը համալրել եվրոպական չափանիշներին համապատասխան բազմապրոֆիլ բժշկական ծառայություններ մատուցող ևս մեկ բուժհաստատությամբ: «Կենտրոնում առաջին հերթին մատուցվելու են որակյալ բուժծառայություններ»,-տեղեկացրեց Հովակիմյանը: Նա ընդգծեց, որ կենտրոնը հագեցած է վերջին սերնդի բարձրակարգ բ ժշկական սարքավորումներով և վերապատրաստում անցած մասնագետներով:

Կենտրոնի շինարարական աշխատանքները մեկնարկել էին 2012 թվականին' նախկին «Ճշգրիտ սարքավորումներ» գործարանի մասնաշենքում, որը 2005 թվականին սեփականաշնորհվել էր և գտնվում էր անբարեկարգ վիճակում: Երկու տարվա ընթացքում իրականացվել են գործարանի հիմնական մասնաշենքի 3603 քմ և մոտ 1500 քմ օժանդակ տարածքի վերանորոգում:

Արդյունքում ստեղծվել է վերջին սերնդի ախտորոշիչ և բժկական սարքավորումներով հագեցած արդիական բժշկական կենտրոն, որն ունի 5 վիրահատարան, ծննդատուն, ինտենսիվ բուժման գինեկոլոգիական, էնդոսկոպիկ, ընդհանուր, միկրո և պլաստիկ վիրաբուժության, օրթոպեդիայի, վնասվածքաբանության, ուռոլոգիայի, անոթային, քիթ-կոկորդ-ականջաբանության բաժանմունքներ, ինչպես նաև լաբարատոր և ախտորոշիչ լայն սպեկտրի ծառայություններ, ներառյալ' համակարգչային շերտագրություն և ռենտգեն: Կենտրոնի հիվանդասենյակները համապատասխանում են եվրոպական ժամանակակից պահանջներին: Բժշկական սարքավորումների ներդրման, շահագործման և անձնակազմի վերապատրաստման համար բանակցություններ են վարվել Toshiba, Pentax, Storz, Roche, Diagnostic և Drager ընկերությունների ներկայացուցիչների հետ:

«Սլավմեդ»-ն առաջիկա տարիներին մտադիր է Հայաստան հրավիրել արտերկրում ճանաչված և փորձառու մասնագետների' հայ բժիշկների շարունակական վերապատրաստում ապահվելու համար: Բժշկական կենտրոնն ունի 180 աշխատակից, որոնցից 55-ը' բժիշկներ, 75-ը' միջին բուժաշխատողներ: Մոտակա ամիսներին բուժհաստատությունը կհամալրվի ևս 20 նեղ մասնագետներով և բուժքույրերով: