«Հրապարակ». Վանաձորի վթարային շենքերում փլուզման վտանգ է առաջացել

Վանաձորի վթարային շենքերին թերթը բազմիցս անդրադարձել է, ինչպես ասում են՝ ապարդյուն: Տարվա այս եղանակին անձրեւաջրերի պատճառով որոշ շենքերի վիճակն ավելի է վատթարացել: Գրում է «Հրապարակ»-ը:

Երեկ՝ փետրվարի 20-ին, փլուզման վտանգ է առաջացել Վանաձոր քաղաքի Չուխաջյան 46 շենքում: Այս մասին բնակիչներն ահազանգել են ԱԻՆ Լոռու մարզային փրկարարական վարչություն: Դեպքի վայր ժամանած հրշեջ-փրկարարները պարզել են, որ շենքի առաջին եւ երկրորդ հարկի պատերից քարեր են պոկվել-թափվել, ինչը բնակիչների մոտ խուճապ է առաջացրել: Պատկերացնել կարելի է, թե ինչ վախ են ապրել երկրաշարժից մինչ օրս երրորդ աստիճանի վթարայնություն ունեցող շենքում բնակվող մարդիկ: Ի դեպ, հարկ է նշել, որ շենքը վթարայնության աստիճան ստացել է 2006-ին: Իսկ այս 8 տարիներին որեւէ ամրացման աշխատանք շենքի վրա չի իրականացվել, ու եթե վթարայնության աստիճանի համար նոր ուսումնասիրություններ արվեն, չի բացառվում, որ շատ բազմաբնակարանների նման այս շենքն էլ ճանաչվի 4-րդ աստիճանի՝ քանդման ենթակա:

Շենքի բնակիչները մեզ հետ զրույցում պատմեցին, որ իրենք բազմաթիվ անգամներ են դիմել թե թաղապետարան, թե քաղաքապետարան ու թե մարզպետարան, սակայն իրենց որեւէ մեկը վերջնական պատասխան չի տալիս. «Տանիքը նորոգման ենթակա է, անձրեւաջրերը լցվում են վերեւի հարկի տները, առանց էդ էլ քայքայված պատերն ավելի են թուլացել, հիմա էլ քարերն են թափվում, հազար անգամ զանգել ենք քաղաքապետարան ու թաղապետարան, բայց տեր լինող չկա, դրա համար էլ հիմա փրկարարներին ենք զանգել»:

Շարունակությունը` թերթի այսօրվա համարում: