ԱՄՆ-ն չի պաշտպանի նախագահ Յանուկովիչի պաշտոնաթողության պահանջը

Վաշինգտոնում չեն պաշտպանում Ուկրաինայի նախագահ Վիկտոր Յանուկովիչի պաշտոնաթողության վերաբերյալ այդ երկրի ընդդիմության պահանջը: Այդ մասին ԱՄՆ-ի դեսպան Ջեֆրի Փայեթը հայտարարել է CNN հեռուստաալիքի «Ամանփուր» ծրագրին տված հարցազրույցում:

«Մեր դիրքորոշումն այն է, որ նախագահ Յանուկովիչը պետք է իր երկիրը տանի դեպի նոր ապագա և դա հարկավոր է անել նոր կառավարության ստեղծման, սահմանադրության մեջ փոփոխություններ կատարելու եւ քաղաքական կարգը վերականգնելու միջոցով»,-ասել է Փայեթը:

Դեսպանի խոսքով՝ Ուկրաինայի մայրաքաղաքում կայունությունն ու խաղաղությունը վերականգնելու համար Կիևից կպահանջվեն վճռական գործողություններ և «հզոր ազդանշաններ», որոնք կվկայեն այն մասին, որ արյունահեղության համար մեղավորները պատասխանատվություն կկրեն:

Իր հերթին ԱՄՆ-ի պետքարտուղար Ջոն Քերին հորդորել է Յանուկովիչին բանակցություններ վարել ընդդիմության հետ և հայտնել է, որ Ուկրաինայի մի շարք քաղաքացիների նկատմամբ այցագրային պատժամիջոցներն արդեն գործում են:

«Բանսարկությունների ու խաղերի համար ժամանակ չկա: Նախագահ Յանուկովիչը պետք է անհապաղ լուրջ բանակցություններ սկսի ընդդիմության առաջնորդների հետ, որպեսզի ստեղծի լայն աջակցություն վայելող անցումային կառավարություն»,-ասված է Քերրիի հայտարարության մեջ:

Ավելի վաղ պետդեպարտամենտը հաղորդել է, որ արգելված է Ուկրաինայի 20 քաղաքացիների մուտքն ԱՄՆ, որոնց Միացյալ Նահանգները մեղավոր է համարում Ուկրաինայում անկարգությունների ընթացքում մարդկանց զոհվելու համար: