Առողջապահության նախարարությունն առողջ ապրելակերպի քարոզման հարցում վճռական է տրամադրված

ՀՀ առողջապահության նախարարությունը 2014 թվականը հայտարարել է առողջ ապրելակերպի տարի: Առողջ ապրելակերպի խթանմանն ուղղված մեխանիզմների ներդրման նպատակով 2014 թվականի առաջին եռամսյակում ՀՀ կառավարության հաստատմանը կներկայացվի «Առողջ ապրելակերպի խթանման ռազմավարական ծրագիրը և ծրագրի կատարումն ապահովող միջոցառումների ցանկը»: Փետրվարի 21-ին հրավիրված ասուլիսում ՀՀ առողջապահության նախարարի տեղակալ Սերգեյ Խաչատրյանը նշեց, որ բնակչության առողջության պահպանմանը, ամրապնդմանը և առողջության խթանմանն ուղղված առանցքային քաղաքականություններից է առողջ ապրելակերպի ձևավորումը և յուրաքանչյուրի մոտ սեփական առողջության նկատմամբ պատասխանատվության բարձրացումը: «Մենք բազմիցս խոսել ենք այն մասին, որ ամբողջ աշխարհում և Հայաստանում ևս պայքար է տարվում ոչ ինֆեկցիոն, ոչ վարակիչ հիվանդությունների դեմ, որոնք մեծ տարածվածություն են գտել»,-նշեց Խաչատրյանը:

Նրա խոսքով' ոչ վարակիչ հիվանդությունների բուժման նպատակով կիրառվում են ժամանակակից մեթոդներ, դեղորայք, սակայն դրանից առավել կարևոր է առողջ ապրելակերպի մասին գիտելիքների բարձրացումը: «Մեզ համար շատ կարևոր է հիվանդ մարդուն բուժելը, ոտքի կանգնեցնելը, բայց պետք է խոսել ռիսկի ֆակտորների մասին և այն միջոցառումների մասին, որոնք, պարզ լինելով հանդերձ, կարող են բազմաթիվ խնդիրներ լուծել»,-պարզաբանեց նախարարի տեղակալը' հավելելով, որ նախարարությունը առողջ ապրելակերպի քարոզման հարցում վճռական է տրամադրված:

ՀՀ ԱՆ աշխատակազմի հանրային առողջապության բաժնի պետ Լուսինե Քոչարյանը, ներկայացնելով առողջ ապրելակերպի խթանմանն ուղղված ռազմավարական ծրագրի գլխավոր ուղղությունները, տեղակացրեց' այլ երկրների օրինակը ցույց է տալիս, որ նման միջոցառումները քիչ ծախսատար են, բայց մեծ արդյունքների են հանգեցնում: «Առողջ ապրելակերպին ուղղված ծրագրերը բարելավում են երկրի տնտեսական ցուցանիշները: Դրանց կիրառումն ապահովելու է պետական կառավարարման և տեղական ինքնակառավարման մարմինների հետ սերտ համագործակցություն, ինչպես նաև քաղաքացիական հասարակության ներգրավում»,-ասաց Քոչարյանը:

Ռազմավարական ծրագիրը ներառելու է օրենսդրական բարեփոխումների բաժին: Կփոփոխվեն և նորովի կներկայացվեն «Գովադի մասին օրենքը», կխստացվեն ալկոհոլի և ծխախոտի օգտագործման սահմանափակումները, կվերանայվի արագ սննդի հարկային քաղաքականությունը:

Առողջ ապրելակերպի տարում կիրականացվեն նաև մի շարք կրթական միջոցառումներ, կտպագրվեն ուղեցույցներ: Քայլեր կձեռնարկվեն, որպեսզի կրթական հաստատություննեորւմ սահմանափակվի գազավորված ըմպելիքների վաճառքը:

ՀՀ ԱՆ Առողջապահության ազգային ինստիտուտի տնօրենի տեղակալ Ալեքսանդր Բազարչյանը շեշտեց, որ Հայաստանում մահերի շուրջ 80 տոկոսը պայմանավորված է սիրտ-անոթային հիվանդություններով, քաղցկեղով և շաքարային դիաբետով: «Սրանք այն հիվանդություններն են, որտեղ մարդու ապրելակերպն ունի վճռական դեռ: Խոսքը նոր մշակույթի ձևավորման մասին է: Մասնագետները պետք է լուսաբանեն առողջ ապրելակերպի դրական կողմերը, սակայն վերջնական որոշումը յուրաքանչյուր մարդ ինքն է իր համար կայացնում»,- կարծիք հայտնեց Բազարչյանը:

Բանախոսները առողջ ապրելակերպի քարոզման գործում կարևորեցին նաև ԶԼՄ-ների դերը: Բացառված չէ, որ առաջիկայում ԱՆ-ն կհայտարարի մրցույթ' առողջ ապրելակերպի մասին լավագույն լուսաբանման համար:

Պաշտոնական վիճակագրության համաձայն՝ Հայաստանում կյանքի միջին տևողությունը կազմել է 73.9 տարի. կանանց շրջանում`77, իսկ տղամարդկանց' 70.6 տարի: Պաշտոնական տվյալները փաստում են, որ կյանքի սպասվող տևողությունը կանանց մոտ 5-6 տարով գերազանցում է տղամարդկանց ցուցանիշը: Հանրապետության չափահաս բնակչության շրջանում մահացության ընդհանուր կառուցվածքում առաջին տեղը զբաղեցնում են արյան շրջանառության համակարգի հիվանդությունները, որոնց տեսակարար կշիռը 2010 թվականին կազմել է 49 տոկոս, երկրոդ տեղը զբաղեցնում են չարորակ նորագոյացությունները` 19.9 տոկոս, երրորդը` շաքարային դիաբետը' 5 տոկոս, չորրորդը' վնասվածքները և թունավորումները' 4.5 տոկոս: