ԱՄՀ-ն Հայաստանի կողքին է կուտակային կենսաթոշակային բարեփոխումների ներդրման գործում

Արժույթի միջազգային հիմնադրամը անհրաժեշտ է համարում Հայաստանում կուտակային կենսաթոշակային բարեփոխումների իրականացումը, և կառույցը ևս աջակցելու է Հայաստանի Հանրապետության ջանքերին' հաղթահարելու այդ մարտահրավերները: Երևանում անցկացվող Կենսաթոշակային երրորդ միջազգային տարեկան համաժողովի ժամանակ այս մասին նշեց Արժույթի միջազգային հիմնադրամի երևանյան գրասենյակի ղեկավար Տերեսա Դաբան Սանչեսը: «Այս համատեքստից էլ բխում է ամուր համագործակցությունը Հայաստանի հետ, որի շրջանակներում ԱՄՀ-ն միշտ աջակցել է կառավարության նոր կենսաթոշակային համակարգի ստեղծման ուղղված ջանքերին: Ինչպես արդեն նշվեց, սա բավականին բարդ առաջադրանք է և դժվար գործընթաց, որը պահանջում է ժամանակ, ջանքեր, որպեսզի հանրությունը հասկանա, թե որն է այս բարեփոխման իրական ողջամտությունը: Մյուս կողմից' այդ քայլերն արվում են բավականին բաց, թափանցիկ ձևով, հանրության կարծիքները հաշվի առնելով»,- նշեց Տերեսա Դաբան Սանչեսը:

Նա ներկայացրեց այն հիմնական դրույթները, որնց համաձայն' կենսաթոշակային բարեփոխումները կարևոր են Հայաստանի համար: «Կցանկանայի նշել երեք հիմնական կետեր. առաջինը՝ ռազմավարությունն է, հասարակական մոտեցումները, որոնք ժառանգել է Հայաստանի կառավարությունը, այնուհետև այս բարեփոխումների պետական կողմը և երրորդը' երաշխիքները: Ահա այս երեք հիմնական գործոններն են, որոնք օգնելու են Հայաստանի կառավարությանը հետագա քայլերն իրականացնելու ուղղությամբ և հաղթահահարելու մնացած մարտահրավերները: Կենսաթոշակային բարեփոխումները շատ հստակ ուղղվածություն ունեն, սա չափազանց դրական կետ է, որովհետև նախատեսվում են տարբեր աջակցություններ, եկամտի ավելացում, հետևաբար, հստակ նպատակ են հետապնդում ծերերի համար՝ թոշակի ապահովման մասով, այսիքն' այն մարդկանց համար, ովքեր, այսպես ասած, ամենաշատն են տուժում: Նպաստելու է բյուջետային բեռի նվազեցմանը, ենթակառուցվածքի վերականգնմանը: Բացի այդ, ես հավատացած եմ, որ այն օգնելու է ստվերային տնտեսության վերացմանը, որովհետև գործատուները, աշխատողները հասկանալու են, որ պետք է անցնեն նոր համակարգի: Ի վերջո, Հայաստանի ջանքն սկզբունքորեն ուղղված է այս խնդրի լուծմանը, ավելացված խնայողությունների ապահովմանը: Դա լինելու է մի ուղի, որը տանելու է դեպի ֆինանսական նոր հոսքերի, ամրագրելու է նաև տնտեսական խնդիրների նվազեցումը, որը լրացուցիչ հնարավորություն է ներդրողների, աշխատողների ու գործատուների համար»,- փաստեց Տերեսա Դաբան Սանչեսը:

Անդրադառնալով Հայաստանի' որպես պետության կողմից տրվող երաշխիքներին'ԱՄՀ ներկայացուցիչը նշեց, որ նոր համակարգն ընդգրկում է չափազանց կարևոր դրույթներ, որոնք ապահովում են համակարգի անվտանգ լինելը: «Ես կցանկանայի ևս մեկ անգամ դրանց անդրադառնալ, որովհետև չափազանց կարևոր են այդ հարցերը: Առաջին հերթին' անհատական հաշիվները, որոնք սկզբունքորեն օգնում են մարդկանց, քանի որ դրանք իրենց անհատական միջոցներն են. դա ոչ թե հարկ է, այլ իրենց սեփականությունն է: Երկրորդ բաղադրիչը հատուկ կառավարման համակարգի ստեղծումն է: Սա նույնպես կարևոր խնդիր է, որ ովհետև խնայողությունների կառավարումը երկարաժամկետ հատվածում բավականին բարդ աշխատանք է, այն պահանջում է փորձագիտական գիտելիք, ներուժ: Այս համակարգի պարագայում կառավարումը վստահվելու է բավականին փորձ ունեցող կառավարիչների»,-նշեց նա'հավելելով, որ Հայաստանի կառավարությունը երաշխավորելու է, որ թոշակառուն ստանա դրական հաշվեկշիռ, որը հակադրվում է սղաճին: «Շատ երաշխիքներ կան, որպեսզի համակարգն անվտանգ լինի: Կենտրոնական բանկը հստակ վերահսկելու է կառավարիչներին, շատ հստակ սահմանափակումներ կան նաև հատկացումների, արտարժույթի մասով, սրանք բոլորը չափազանց կարևոր երաշխիքներ են: Ի վերջո, կլինի բավական ամուր ամրագրված վարչարարական մեխանիզմ: Կարծում եմ՝ սրանք նույնպես հայեցակետեր են: Պետք է հիշել, որ այս բարեփոխումը շատ կարևոր է, դրական է Հայաստանի համար: Եզրափակելով խոսքս՝ կցանկանայի ևս մեկ անգամ արտահայտել մեր շարունակական պատրաստակամությունը. աջակցություն տրամադրվելու է Հայաստանի Հանրապետության կառավարությանը»,- ասաց Արժույթի միջազգային հիմնադրամի երևանյան գրասենյակի ղեկավար Տերեսա Դաբան Սանչեսը: