«Հրապարակ». Դուք ձեր դարդը լացեք, գործ չունեք Ուկրաինայի հետ. նրանք պայքարի կամք ունեն

Երբ հետեւում ես մեր որոշ վայ-գործիչների եւ նրանց արբանյակների ողբ ու կականին, թե՝ վայ, հասեք՝ Ուկրաինան քանդվեց, ավերվեց, արյուն հեղվեց, քաղաքացիական պատերազմ է, էս ինչ զուլում բան եկավ էդ սիրուն երկրի գլխին, չգիտես՝ լաս, թե խնդաս: Ուզում ես այս «կեկելներին» ասել՝ դուք ձեր դարդը լացեք, գործ չունեք Ուկրաինայի հետ: Ուկրաինացիք, ի տարբերություն ձեզ, շատ լավ հասկանում են իրենց օգուտն ու վնասը, քաղաքական մտածողություն ունեն, պայքարի կամք եւ բավականաչափ հայրենասեր են:

Անշուշտ, այս ողբասացների մեծ մասն իշխանության թեւի տակ ծվարածներն են, ովքեր սարսափում են այն մտքից, որ մի օր էլ հայ հասարակությունը կարող է ոտքի կանգնել եւ իր իրավունքների համար պայքարել: Եվ նրանց հույսն այն է, որ ներշնչանքով ու «մայդանը» դատապարտելով կկասեցնեն նման պրոցեսների ընթացքը մեզանում: Ուզում եմ հորդորել այսպես մտածող քարոզիչներին՝ ձեր վաշվիշը մեր հասարակության մի չնչին մասի վրա է ազդեցություն գործելու, մյուս հատվածը զերծ է այդ ազդեցությունից եւ առաջնորդվում է սեփական պատկերացումներով ու սեփական շահերով: Երեկ ոստիկաններից մեկը, օրինակ, ի պատասխան այն հանդիմանության, թե 2013-ին լրագրողների նկատմամբ կիրառված բռնության դեպքերը 2012-ի համեմատ աճել են, ասում էր՝ բայց միջոցառումներն էլ են, չէ՞, մի հարյուր անգամ ավելացել:

Այո, անգամ առանց վիճակագրական տվյալներ ունենալու եւ սոցիոլոգիական հետազոտություններ անելու ակնհայտ է, որ պայքարի ընդունակ մարդիկ մեզանում ավելանում են, ակցիաները՝ աճում: Իսկ երբ մարդը պայքարում է սոցիալական, աշխատանքային, բնապահպանական խնդիրների հետ կապված, մի օր էլ կսկսի պայքարել քաղաքական իրավունքների համար: Կլինի դա Մաքսային միությանն անդամագրում, թե ընտրությունների կեղծում:

Շարունակությունը` «Հրապարակ»-ի այսօրվա համարում: