Հայաստանում 5 սպանդանոցների կառուցումը կավարտվի մինչև հուլիս

Հայաստան 24 Փետրվար, 2014 10:47

Հայաստանում մինչև 2014 թվականի կեսերն ավարտված կլինեն 5 սպանդանոցների շինարարական աշխատանքները: Սպանդանոցներում մեկ հերթափոխի ընթացքում հնարավոր է մորթել մի քանի տասնյակ խոշոր և մանր եղջերավոր անասուն: Միաժամանակ, իսլամական օրենքներին համապատասխան «հալալ» մորթ իրականացնող մասնավորի կառուցած սպանդանոցներն արդեն պատրաստ են աշխատել:

Այդ մասին «Արմենպրես»-ի հետ զրույցում նշեց ՀՀ գյուղատնտեսության նախարարարության անասնաբուծության և անասնաբուժության վարչության պետ Աշոտ Հովհաննիսյանը: «Բոլոր 5 սպանդանոցներն էլ կառուցվում են Պարենի և գյուղատնտեսության համաշխարհային կազմակերպության աջակցությամբ: Ներկայումս ընթանում են սպանդանոցների շինարարական աշխատանքները: Հուսով եմ, երկրորդ եռամսյակի վերջին շենքերն արդեն պատրաստ կլինեն, և անհատույց կհատկացվեն սարքավորումները, որպեսզի կարողանան շահագործել»,- ասաց Հովհաննիսյանը: Ծրագրի ընդհանուր բյուջեն 1.6 միլիոն ԱՄՆ դոլար է: Նա տեղեկացրեց, որ կառուցվող սպանդանոցները մեկ հերթափոխի ընթացքում կարող են մշակել մի քանի տասնյակ գլուխ խոշոր եղջերավոր անասուն և շուրջ 100 ոչխար ու խոզ: «Եթե 2-3 հերթափոխով աշխատեն, ցուցանիշներն ավելի մեծ կլինեն»,-նշեց վարչության պետը: Սպանդանոցները կառուցվում են Կոտայքի, Արագածոտնի, Վայոց ձորի մարզերում:

Գյուղնախարարության պաշտոնյան նաև հայտնեց, որ Հայաստանում մասնավոր նախաձեռնությամբ կառուցվող «հալալ» մորթ իրականացնող 3 սպանդանոցի արտադրած միսն արտահանվելու է Իրան և արաբական երկրներ: Երկու սպանդանոց կառուցվել են Կոտայքի մարզի Զորավան գյուղում և Սյունիքի մարզի Սյունիք գյուղում:

«Երկուսն էլ ժամանակակից չափորոշիչներով կառուցված սպանդանոցներ են և ցանկացած պահի պատրաստ են աշխատել, եթե պատվեր լինի Իրան արտահանելու «հալալ» մորթով մորթված ոչխարներ»,-ասաց Հովհաննիսյանը՝ հավելելով, որ 1000 գլուխ ոչխարի մորթի հզորությամբ երրորդ սպանդանոցը իրանցի և հայ գործարարների նախաձեռնությամբ կառուցվում է Մասիսի տարածաշրջանում:

ՀՀ գյուղատնտեսության նախարարության տվյալներով` Հայաստանում գործում է շուրջ 2 տասնյակ սպանդանոց: Նախորդ տարի, 2012 թվականի համեմատ, Հայաստանում մսի արտադրության ծավալն աճել է 9.3 տոկոսով և գերազանցել 72 հազար տոննան: