ԱԺ-ում հարգեցին Ուկրաինայի զոհերի հիշատակը
Հայաստան
Ազգային ժողովի այսօրվա նիստում ԱԺ ՀԱԿ խմբակցության ղեկավար Լևոն Զուրաբյանն առաջարկեց հարգել Ուկրաինայում վերջին դեպքերի հետևանքով մահացած քաղաքացիների հիշատակը:
«Ես առաջարկում եմ, որ մենք պառլամենտում մեկ րոպե լռությամբ հարգենք Ուկրաինայում իշխանությունների կողմից մահաբեր զենքի կիրառման պատճառով տասնյակ զոհերի հիշատակը: Դա ընդհանրապես մեծ չարիք է, մեծ ողբերգություն է եղել ու մենք պարտավոր ենք հոտնկայս հարգել նրանց հիշատակը՝ ցույց տալով, որ մեզ համար դա անընդունելի, դատապարտելի չարիք է»,-ասաց Զուրաբյանը:
Վերջինիս ի պատասխան` ԱԺ նախագահ Հովիկ Աբրահամյանն ասաց, թե ինքը դեմ չէ. «Ես դեմ չեմ, որ մենք հարգենք բոլոր զոհերի հիշատակը, ոչ միայն մահաբեր զենքից զոհերի, կամ ոստիկաններին ինչո՞ւ չհարգենք, որ մարդիկ սպանվել են: Եկեք հարգենք զոհերի հիշատակը»:
Խորհրդարանը հոտնկայս, մեկ րոպե լռությամբ հարգեց զոհերի հիշատակը, ինչից հետո ՀՀԿ-ական պատգամավոր Մարգարիտ Եսայանն էլ հայտարարեց, թե այո, դեպքերը ցավալի են, բայց առաջարկը ՀԱԿ պատգամավորի կողմից արվեց դիվիդենտներ շահելու համար:
«Ճիշտ կլիներ, եթե նման առաջարկ անեիք այն ժամանակ, երբ Սիրիայում էին դեպքեր տեղի ունենում, մահանում էին մեր հայրենակիցները: Պետք չէ սիրուն դեմքով վատ բաներ անել»,-ասաց Եսայանը:
ՈՒՂԻՂ ԵԹԵՐ
Ամենադիտված 
Այսօր մեր ընտանիքին բաժին հասավ ամենածանր կորուստը
