ՀՀԿ պատգամավորը կառավարության հրաժարականի նախաձեռնությունը անհեռանկարային է համարում, ազգագրագետը` շոու

Խորհրդարանական ոչ իշխանական չորս խմբակցությունների' կառավարության հրաժարականը պահանջելու նախաձեռնությունն անհեռանկարային է: Փետրվարի 25-ին հրավիրված ասուլիսում Ազգային ժողովի ՀՀԿ խմբակցության պատգամավոր Սուքիաս Ավետիսյանը նշեց, որ խմբակցությունները լավ գիտեին, որ մեծամասնությունը չէր ողջունելու այդ նախաձեռնությունը: «Մեզ համար ավելի տեսանելի է Կառավարության աշխատանքը և գնահատականը մենք ավելի լավ կարող ենք տալ, քան իրենք: Սա պարզապես հերթական նախաձեռնությունն էր, որը հեռանկար չունի»,-կարծիք հայտնեց Ավետիսյանը: Նա չհերքեց, որ երկրում առկա են մի շարք խնդիրներ, որոնք չեն լուծվել, սակայն դա չի նշանակում, որ այս կառավարությունը լավ չի աշխատում:

Ազգագրագետ Հրանուշ Խառատյանը հակափաստարկելով նշեց, որ չորս խմբակցությունների պահանջը հասկանալի է, քանի որ կառավարության աշխատանքի արդյունքում չի փոխվում հանրության բարեկեցությունը, սոցիալական բևեռացումը շարունակում է խորանալ, սակայն խմբակցությունները իրենք պահանջի հետևից չգնացին: «Ընդդիմադիր ուժերը հասունացնում են հրաժարականի հարցը, և այդպես էլ մինչև վերջ չեն հասունացնում: Չկան համաձայնեցված մոտեցումներ, նախ ընդդիմությունը չունի բավարար փաստարկներ հրաժարականի համար, կամ չեն աշխատել և չեն հավաքել փաստարկները կամ լուրջ չէ հրաժարականի խնդիրը»,-դիրքորոշում հայտնեց Խառատյանը, ում կարծիքով կառավարության հրաժարականի նախաձեռնությունը ավելի շատ շոու է հիշեցնում:

Անդրադառնալով ՀՀ երկրորդ նախագահ Ռոբերտ Քոչարյանի փետրվարի 24-ին տված հարցազրույցին' Ավետիսյանը նշեց, հարցազրույցում ինքը տեսել է լուրջ մտահոգություններ: «Մաքսային միությանը միանալու որոշումը կայացված է, և եթե կան օբյեկտիվ առաջարկություններ, ապա համապատասխան կառույցները հաշվի կառնեն»,-ասաց բանախոսը:

Հրանուշ Խառատյանն էլ նշեց, որ այն, որ երկրորդ նախագահը նախընտրեց Մաքսային միության թեմայով հարցազրույցով հանդես գալ 2013 թվականի սեպտեմբերի 3-ից բավականին ժամանակ անց, գուցե պայմանավորված է այն հանգամանքով, որ իրեն` որպես քաղաքական հայտ ունեցող անձի, անհրաժեշտ էր բավականաչափ ժամանակ այդ հարցերի շուրջ դիրքորոշումներ ձևավորելու համար:

Ազգային ժողովի ոչ իշխանական չորս ուժեր մի քանի հանդիպում են ունեցել' հստակեցնելու կառավարության հրաժարականի հարցում իրենց քայլերը, սակայն դեռևս ոչ մի պայմանավորվածության գալ չեն կարողացել: