Արցախի Տիգրանակերտի մասին ֆիլմ է նկարահանվել

«Տիգրանակերտին աջակցողներ» ուսանողական ակումբը շարունակում է Արցախի Տիգրանակերտի հանրահռչակմանը միտված աշխատանքներ իրականացնել: Ակումբն երկրորդ անգամ է հանդես գալիս Տիգրանակերտի մասին պատմող ֆիլմով: «Մենք Տիգրանակերտում- 2» 30 րոպե տեւողությամբ սիրողական անդրադարձը պատմում է Արցախի Տիգրանակերտում 2012 թվականին իրականացված պեղումների, ինչպես նաեւ դրանց արդյունքում հայտնաբերված պեղածոների մասին: Այս մասին ասաց Արցախի Տիգրանակերտի արշավախմբի ղեկավար Համլետ Պետրոսյանը, ԵՊՀ հնագիտության եւ ազգագրության ամբիոնին կից գործող «Տիգրանակերտին աջակցողներ» ուսանողական ակումբը մի քանի տարի է, ինչ մասնակցում է արշավախմբի աշխատանքներին: «Ֆիլմը շարունակական է լինելու: Նկարահանվել եւ շուտով արդեն youtube-ում կհայտնվի 2013 թվականին արշավախմբի կատարած աշխատանքը: Մայիս ամսին էլ ակումբի նախաձեռնությամբ Տիգրանակերտի հանրահռչակմանն ուղղված եւս մեկ մեծ ցուցադրություն կներկայացվի ԵՊՀ-ում»,-ասաց նա:

Պետրոսյանը նշեց, որ շուտով պատրաստ կլինի նաեւ Տիգրանակերտի նոր պորտալը: ՀՀ ԳԱԱ հնագիտության և ազգագրության ինստիտուտի Արցախի արշավախումբը 2005թ. հայտնաբերել է Հայոց արքա Տիգրան Բ Մեծի (95-55 թթ. Ք.ա.) կողմից Արցախում հիմնած Տիգրանակերտ քաղաքը և 2006-2008 թթ. հնագիտական պեղումներ է կատարել դրա տարածքում: Այն Տիգրանի անունը կրող միակ բնակավայրն է, որի տեղը ճշգրտորեն պարզված է, և որն ենթարկվում է հնագիտական հետազոտության: Պեղումների արդյունքում բացվել են քաղաքի Միջնաբերդի պարիսպների մի հատվածը, Ամրացված թաղամասի պարիսպների ժայռափոր հիմքերը, նույն թաղամասի դարավանդներից մեկի հենապատը, Կենտրոնական թաղամասի բազիլիկ եկեղեցու մի հատվածը: Հետախուզական պեղումներ են կատարվել նաեւ Ամրացված թաղամասի ու Կենտրոնական թաղամասի մի քանի հատվածներում, Վաղքրիստոնեական դամբարանադաշտում: Հետազոտվել են նաեւ քաղաքի մերձակայքում գտնվող պաշտամունքային-քարայրային համալիրը, նրա ստորոտով անցնող ժայռափոր ջրանցքը, Խաչենագետի ձախ ափին գտնվող վաղմիջնադարյան ամրոցը: