Ղրիմի բնակիչները պահանջում են չճանաչել Կիևի նոր իշխանություններին

Փետրվարի 25-ին Սիմֆերոպոլում տեղի է ունենում է Ղրիմի բնակիչների հանրահավաքը, որի մասնակիցներն Ուկրաինայում տեղի ունեցած իշխանափոխությունը համարում են պետական հեղաշրջում և ինքնավար հանրապետության ղեկավարությունից պահանջում են չենթարկվել Կիևի կարգադրություններին: Այս մասին հայտնում է ria.ru-ն:

Ղրիմի Գերագույն խորհրդի շենքի մերձակա հրապարակումմ, որտեղ անցկացվում է հանրահավաքը, հավաքվել է, ըստ լրագրողների հաշվարկների, շուրջ 300 մարդ: Ղրիմի խորհրդարանի շենքի մոտ չկան իրավապահ մարմինների համազգեստով ներկայացուցիչներ: Հավաքվածների մեծամասնությունը միջին տարիքի տղամարդիկ են. մարդիկ եկել են առանց ցուցապաստառների և քաղաքական կուսակցությունների խորհրդանիշների:

«Ղրիմի այն պաշտոնյաներն ու քաղաքական գործիչները, որոնք ղրիմցիներին դրդում են ճանաչել անօրինական իշխանությանը, պետք է հեռացվեն զբաղեցրած պաշտոններից որպես հանցավոր հեղաշրջման մասնակիցներ»,-ասված է թռուցիկներում, որոնք հավաքվածներին բաժանում են հանրահավաքի կազմակերպիչները:

Ղրիմի Ինքնավար Հանրապետության (ՂԻՀ) Գերագույն Խորհուրդը (ԳԽ) հանդես է եկել հայտարարությամբ, որում ասված է, թե Ղրիմի իշխանություններն սպասում են Ուկրաինայում քաղաքական ճգնաժամի շուտափույթ լուծման և անհանգստացած են առանձին ժողովրդական պատգամավորների և նրանց ընտանիքի անդամների նկատմամբ գործադրվող ճնշումից ու ահաբեկումից:

«Վերջին օրերս հաջողվել է հասնել գլխավորին՝ կանգնեցնել արյունահեղությունը: Այնուամենայնիվ, ճգնաժամը դեռեւս հեռու է լուծումից. պակաս կարևոր չէ, որ խորհրդարանականները խստիվ գործեն գոյություն ունեցող իրավական դաշտի շրջանակներում՝ չանցնելով սահմանը, որից այն կողմ նրանց կողմից ընդունված որոշումների օրինականությունը կարող է կասկածի տակ դրվել: Ստիպված ենք արձանագրել, որ առայժմ դա նրանց ոչ միշտ է հաջողվում»,-նշվում է հաղորդագրության մեջ:

ՂԻՀ ԳԽ նախագահությունում տագնապ են հայտնում «ճնշման, ահաբեկման ու շանտաժի դեպքերի» առնչությամբ, որոնց ենթարկվում են առանձին ժողովրդական պատգամավորներ ու նրանց ընտանիքները»: «Կազմվում են «ժողովրդի թշնամիների» ցուցակներ, ովքեր «հանցագործություններ են կատարել մարդկության դեմ», նշվում է հայտարարության մեջ:

Խորհրդարանի ղեկավարությունը հավաստիացրել է, որ անհրաժեշտ ամեն ինչ կանի թերակղզում քաղաքական ու տնտեսական կայունությունը, ազգամիջյան համաձայնությունը պահպանելու, բռնության և ծայրահեղականության դրսևորումներ թույլ չտալու համար: