Ոչ մեկդ ջանք չեք խնայում, որ երկրի վարչապետին փնովեք. Հովիկ Աբրահամյան

Ազգային ժողովում այսօր քննարկման է դրվել ՀՅԴ խմբակցության կողմից ներկայացված «Նաիրիտի» հարցով հանձնաժողով ստեղծելու մասին հարցը:

Քննարկման ժամանակ արտահերթ ելույթով հանդես եկավ ԱԺ նախագահ Հովիկ Աբրահամյանը:

Վերջինիս կարծիքով` այս ամբիոնը միմյանց վիրավորելու ամբիոն է դարձել:

ԱԺ նախագահը շեշտեց, որ իշխանությունները կողմնակից են, որ ստեղծվի նման հանձնաժողով: Նա հիշեցրեց, որ մոտ քսան օր առաջ ոչ ոք չէր հավատում, որ գազի հարցով հանձնաժողով կստեղծվի, սակայն ինքն իր խոստումը պահեց ու հիմա այդ հանձնաժողովը կստեղծվի:

Հովիկ Աբրահամյանը հորդորեց ամեն անգամ իշխանություններին չմեղադրել հարցերը թաղելու, կոծկելու մեջ:

«Մենք ոչ մի բան չունենք կոծկելու, հիշեք միշտ, մենք ոչ մեկի հետ չունենք պայման, որ իշխանության ներկայացուցիչ գա պաշտոնի ու զբաղվի ապօրինություններով, կոռուպցիայով, մենք դեմ ենք ի սկզբանե: Գալիս եք, այս ամբիոնից մեզ քննադատում, ասում եք՝ սիրելի մեծամասնություն, չգիտեմ ինչ, մեզ պետք չի սիրել, մեզ պետք է հարգել, մեզ հետ պետք է աշխատել, համագործակցել»,-ասաց Աբրահամյանը:

ԱԺ նախագահը` դիմելով ՀՅԴ խմբակցությանն, ասաց, որ նրանք համաձայնել են, որ մինչև աշուն հանձնաժողովը ստեղծվի, և ինքը կտա այդ հնարավորությունն անդրադառնալու այս հարցին աշնանը:

«Աշունն անդրադառնալու եք այդ հարցին, ինչու եք մեկդ մյուսին նեղացնում»,-ասաց նա ու հավելեց. «Հարիր չէ այս ամբիոնից ամեն րոպե երկրի վարչապետի անունը հնչեցնել, մեղադրել այս կամ այն գործերի մեջ, եթե կա նման խնդիրներ, դիմել ենք փորձել ենք ուսումնասիրել, վերհանել, եթե կան խնդիրներ, պատասխանատվության ենթարկեք, ամեն անգամ ոչ մեկդ ջանք չեք խնայում, որ երկրի վարչապետին փնովեք, վարչապետի եղբայրը, վարչապետը»,-եզրափակեց նա: