Հայաստանի համար օրակարգային է ՀԱՊԿ ավիացիոն միացյալ ուժերի եւ հակաօդային պաշտպանության ստեղծումը

Հայաստանը ՀԱՊԿ առանցքային անդամ երկրներից է եւ շահագրգիռ է կառույցի թե’ քաղաքական, թե’ ռազմական բաղադրիչների զարգացմամբ: Ազգային անվտանգության խորհրդի քարտուղար Արթուր Բաղդասարյանի գնահատմամբ, ՀԱՊԿ-ի հետ համագ ործակցության եւ ռազմական բաղադրիչի զարգացման առումով շատ կարեւոր է ՀԱՊԿ արագ արձագանքման ստորաբաժանումների վերազինման, ժամանակակից տեխնիկայով համալրման եւ մշտական պատրաստվածության հարցը: «Այդ կառույցի հետ ռազմական բաղադրիչի ամրապնդումը կարեւոր նշանակություն ունի: Օրակարգային է ՀԱՊԿ ավիացիոն միացյալ ուժերի եւ հակաօդային պաշտպանության ստեղծումը»,- ասաց Արթուր Բաղդասարյանը' հավելելով, որ հարցը փետրվարի 25-ին քննարկվել է Ազգային անվտանգության խորհրդի նիստում եւ արժանացել ՀՀ նախագահ Սերժ Սարգսյանի հավանությանը: Արթուր Բաղդասարյանը շեշտեց, որ ՀԱՊԿ-ը պայմանագիր է կնքել Հայաստանի հետ, հետեւաբար Հայաստանի սահմանին կատարվող ռազմական վտանգի պարագայում կառույցը կմիջամտի:

Ինչ վերաբերում է Լեռնային Ղարաբաղի հանրապետության տարածքում ռազմական գործողությունների սկսման ժամանակ ՀԱՊԿ գործողություններին, Բաղդասարյանն ասաց, որ ԼՂՀ անվտանգության երաշխավորը Հայաստանն է, եւ ՀԱՊԿ-ն այդ պարագայում անելիք չունի:

Հավաքական անվտանգության մասին պայմանագիրը ստորագրվել է 1992թ. մայիսի 15-ին: Պայմանագիրը ստորագրող պետությունների թվում էր նաև Հայաստանի Հանրապետությունը:Կազմակերպությանն անդամակցում են Հայաստանի Հանրապետությունը, Բելառուսի Հանրապետությունը, Ռուսաստանյան Դաշնությունը, Ղազախստանի Հանրապետությունը, Ղրղզստանի Հանրապետությունը, Տաջիկստանի Հանրապետությունը և Ուզբեկստանի Հանրապետությունը: Պայմանագրի համաձայն, մասնակից պետությունները համատեղ ջանքերով դիմակայում են, իսկ անհրաժեշտության դեպքում` նաև վերացնում իրենց ինքնիշխանությանը և տարածքային ամբողջականությանն ուղղված ռազմական սպառնալիքը: ՀԱՊԿ-ին Հայաստանի անդամակցությունը հանդիսանում է ՀՀ անվտանգության ապահովման համակարգի հիմնական բաղադրիչներից մեկը: