«Հրապարակ». Տիգրան Սարգսյանը զուտ հայկական երկխոսության կողմնակից է

Երեկ Տիգրան Սարգսյանը խորհրդարան էր եկել ոչ այնքան պատգամավորների հարցերին պատասխանելու, որքան կոնկրետ նպատակով՝ նիստի ավարտին լրատվամիջոցների առջեւ ելույթ ունենալու եւ իր ու իր եղբոր դերը քիմիական հսկան՝ «Նաիրիտը» տապալելու գործում ժխտելու համար: Հենց այս հարցն էլ սկզբում հնչեց: Գրում է «Հրապարակ»-ը:

Հաջորդը, բնականաբար, ուկրաինական սցենարը Հայաստանում կրկնվելու հեռանկարին էր վերաբերում: Պարզվում է՝ Տիգրան Սարգսյանին ու իր թիմակիցներին գոնե արտաքուստ դա չի հուզում, քանի որ կարծում են, որ օբյեկտիվ հիմքեր չկան, եւ այդ սցենարի մասին ընդամենը երազում են որոշ ագրեսիվ ընդդիմախոսներ: «Բայց իրատեսական չէ, որ այն ՀՀ-ում եւս իրականանա՝ մի քանի պատճառով: Առաջին. մեր քաղաքական թիմի եւ մեր ղեկավարի դիրքորոշումը միշտ եղել է հետեւյալը. մենք պետք է կառուցենք երկխոսության կամուրջներ մեր ընդդիմախոսների հետ՝ լինի դա պառլամենտում, թե պառլամենտից դուրս:

Մենք մշտապես հանդես ենք գալիս որպես համագործակցության եզրեր գտնելու կողմնակիցներ, եւ այդ առումով մեր քաղաքական դիրքորոշումը շատ հստակ է։ Երկրորդը. գաղտնիք չէ, որ մենք ունենք տնտեսական խնդիրներ։ Մենք ինքներս ենք բարձրաձայնում այդ պրոբլեմների մասին, ինչն ունի էական նշանակություն համագործակցության միջավայր եւ մթնոլորտ ձեւավորելու առումով, եւ այդ իմաստով մեր դռները միշտ բաց են»,- ասաց նա: Նկատենք, որ այս դռները բաց են ընդդիմախոսների առաջարկները Տիգրան Սարգսյանի սեղանին դնելու համար, որից հետո այդ առաջարկներն ու նախագծերը նույն տեսքով նույն բաց դռներից վերադարձվում են ընդդիմախոսներին: Ահա այսպիսի զուտ հայկական երկխոսության կողմնակից է Տիգրան Սարգսյանը:

Շարունակությունը` «Հրապարակ»-ի այսօրվա համարում: