Ղրիմում անկարգությունների ընթացքում տուժածների թիվը հասել է 30-ի

Ղրիմում փետրվարի 26-ին տեղի ունեցած անկարգությունների ընթացքում տուժածների թիվը հասել է 30-ի, հաղորդում է ինքնավար հանրապետության առողջապահության նախարարությունը:

«Ըստ վերջին տեղեկատվության՝ այսօր բժշկական օգնության է դիմել արդեն 30 մարդ, որոնք վնասվածք են ստացել Ղրիմի Ինքնավար Հանրապետության Գերագույն ռադայի մոտ կայացած հանրահավաքում մարդկանց զանգվածային կուտակումների ժամամակ: Նրանցից վեցը հոսպիտալացվել են»,-ասված է հաղորդագրության մեջ:

Նրանցից երեքի վիճակը բժիշկները գնահատում են ծանր, ևս երեքինը՝ միջին աստիճանի ծանր: Տուժածներն ստացել են գանգուղեղային վնասվածքներ, որովայնի բութ և այլ վնասվածքներ:

Փետրվարի 26-ին Ղրիմի խորհրդարանի մոտ ընդհարումներն ակտիվացել են, որտեղ միաժամանակ տեղի է ունեցել երկու հանրահավաք՝ այն բնակիչներինը, որոնք հանդես են գալիս Ուկրաինայում իշխանափոխության դեմ, և ղրիմցի թաթարներինը, որոնք այն պաշտպանում են:

Նախօրյակին Ղրիմի բնակիչները բողոքի անժամկետ ակցիա են սկսել Գերագույն խորհրդի շենքի մոտ՝ պատգամավորներից պահանջելով չճանաչել երկրի նոր ղեկավարությանը: Հավաքվածները պահանջում են անցկացնել հանրաքվե, որտեղ բնակիչները կընտրեն տարածաշրջանի հետագա զարգացման ուղին՝ Ուկրաինայի կազմում ինքնավար հանրապետության ներկայիս կարգավիճակում` որպես անկախ պետություն կամ Ռուսաստանի կազմում: