Ոսկեգործական ԱՏԳ-ում կգործեն սփյուռքի ոսկերիչներ, կստեղծվի շուրջ երկու հազար աշխատատեղ

Հայաստանում «ԷՅ ՋԵՅ ԷՅ ՀՈԼԴԻՆԳ» ընկերության տարածքում ստեղծվող մասնագիտացված' ոսկեգործության բնագավառի ազատ տնտեսական գոտին կհամախմբի այդ բնագավառում գործունեություն ծավալող բոլոր հայերին, ովքեր տարածքում կբացեն իրենց գործարանները և կստեղծեն նոր աշխատատեղեր: ՀՀ կառավարության նիստում նման կարծիք հայտնեց ՀՀ վարչապետ Տիգրան Սարգսյանը: Գործադիրը հավանություն տվեց ազատ տնտեսական գոտի ստեղծելու նախաձեռնությանը: «Հիշում եք, նախորդ տարի Երևանում տեղի ունեցավ համաշխարհային ոսկերիչների մեծ համագումար: Ազատ տնտեսական գոտու ստեղծման նախաձեռնությունը գալիս է մասնավոր հատվածից: Երկար նախապատրաստվել ենք այս աշխատանքին: Գոտին հնարավորություն է տալու, որպեսզի ամբողջ աշխարհի հայերը, որոնք զբաղվում են ոսկեգործությամբ, բացեն իրենց գործարանները: Մեծ պահանջարկ է լինելու աշխատուժի նկատմամբ»,-ասաց վարչապետը:

ՀՀ էկոնոմիկայի նախարար Վահրամ Ավանեսյանի խոսքով` նախատեսվում է ԱՏԳ-ում առաջին երեք տարիների ընթացքում ներգրավել մոտ 120-150 ընկերություններ, որոնք կստեղծեն շուրջ 2 հազար նոր աշխատատեղեր և կապահովեն տարեկան շուրջ 200-250 մլն դոլարի արտադրանքի արտահանում: Մինչ 2015 թվականը տարածքի ձեռքբերման, հիմնանորոգման և գործարկման համար պահանջվող ներդրումները գնահատվել են 10.97 մլն դոլար, որից մոտ 6 միլիոնը պլանավորվում է ֆինանսավորել վարկի, իսկ մնացած մասը՝ ԱՏԳ կազմակերպչի սեփական միջոցների հաշվին: Նախատեսվում է, որ ԱՏԳ-ն կսկսի փուլային գործունեություն իրականացնել 2014 թվականից և լիովին կգործարկվի մինչև 2015 թ. վերջ:

Ազատ տնտեսական գոտու ստեղծման նպատակն է օտարերկրյա ուղղակի ներդրումների, ոսկերչական, ակնագործական և ժամագործական ոլորտի միջազգային ընկերությունների ներգրավման միջոցով խթանել արտահանման ծավալների աճը, ստեղծել նոր աշխատատեղեր և նպաստել կայուն տնտեսական զարգացմանը: ««ԷՅ ՋԵՅ ԷՅ ՀՈԼԴԻՆԳ» ՓԲԸ տարածքում ազատ տնտեսական գոտու գործունեության մեկնարկը կնպաստի Հայաստանում ներդրումների և ոսկերչական, ակնագործական և ժամագործական ոլորտի միջազգային ընկերությունների ներգրավմանը, տվյալ հատվածում հայկական բրենդի ճանաչմանն ու տարածմանը, ինչպես նաև նոր աշխատատեղերի ստեղծմանը: Որոշման նպատակն է նախաձեռնել ոսկերչական, ակնագործական և ժամագործական ընկերությունների եզակի արդյունաբերական քլասթերի ստեղծումը Հայաստանի Հանրապետությունում, որը նախատեսվում է իրագործել մասնագիտացված ազատ տնտեսական գոտու հիմնման միջոցով: