Հովիկ Աբրահամյանը մարտի 1-ի գործի վերաբերյալ զրուցել է ՀՀ գլխավոր դատախազի հետ

Ազգային ժողովի նախագահ Հովիկ Աբրահամյանը մարտի 1-ի գործի վերաբերյալ զրուցել է ՀՀ գլխավոր դատախազ Գևորգ Կոստանյանի հետ: Այս մասին ԱԺ նախագահը տեղեկացրեց խորհրդարանում մարտի 1-ի հարցով ժամանակավոր հանձնաժողով ստեղծելու որոշման նախագծի քննարկման ժամանակ: «Ես զրուցել եմ գլխավոր դատախազի հետ մարտի մեկի գործի վերաբերյալ: Նա ինձ հավաստիացրել է, որ աշխատանքները շարունակվում են, գործը գտնվում է իր հսկողության ներքո և հույս է հայտնել, որ առաջիկայում դրական տեղաշարժեր կլինեն»,-նշեց Աբրահամյանը:

Ազգային ժողովը քննարկում է մարտի 1-ի հարցով ժամանակավոր հանձնաժողով ստեղծելու որոշման նախագիծը, որը ներկայացրել է ՀԱԿ խմբակցությունը: Հանձնաժողովի նպատակն է լինելու ուսումնասիրել 2008թ. մարտի 1-2-ին Երեւան քաղաքում տասը անձանց սպանությունների, քաղաքացիական անձանց, ոստիկանության աշխատակիցներին ու զինծառայողներին հրազենային ու այլ մարմնական վնասվածքներ պատճառելու դեպքերով ՀՀ ոստիկանության, Հատուկ քննչական ծառայության, ՀՀ գլխավոր դատախազության ձեռնարկած միջոցառումների ու գործողությունների հիմնավորվածության եւ օրինականության հարցը: