Արմեն Աշոտյանն ու Տարոն Մարգարյանը փոխըմբռնման հուշագիր են ստորագրել

ՀՀ կրթության և գիտության նախարար Արմեն Աշոտյանն ու Երևանի քաղաքապետ Տարոն Մարգարյանը քաղաքապետարանում ստորագրել են փոխըմբռնման հուշագիր՝ կրթության նախարարների 2015 թվականին կայանալիք միջազգային գագաթաժողովին ընդառաջ:

Ինչպես «Արմենպրես»-ին տեղեկացրին ՀՀ կրթության և գիտության նախարարությունից, ՀՀ ԿԳ նախարար Արմեն Աշոտյանը նշել է, որ հանրակրթության ոլորտում քաղաքապետարանն ու նախարարությունը համագործակցության մեծ փորձ ունեն, սակայն համագործակցությունը բարձրագույն կրթության ոլորտում նոր ուղղություն է: Աշոտյանն ընդգծել է, որ 2012 թվականից Հայաստանը ստանձնել է Բոլոնիայի գործընթացի քարտուղարության իրականացումը, և, փաստացի, արդեն երկու տարի անընդմեջ Երևանը դարձել է եվրոպական կրթության մայրաքաղաքը: &l aquo;Նախարարական գագաթաժողովը քարտուղարության կարևորագույն միջոցառումն է, որը իրադարձություն է ոչ միայն կրթական համակարգի, այլև մեր պետության և, անշուշտ, մայրաքաղաքի համար: Քարտուղարությունը ստանձնելուց ի վեր հայաստանյան թիմի աշխատանքը գնահատվում է արդյունավետ: Ես վստահ եմ, որ երևանյան նախարարական գագաթաժողովը լինելու է լավագույններից մեկը Բոլոնիայի գործընթացի պատմության մեջ», - նշել է նախարարը և հավելել, որ Եվրոպայի ուսանաղական միության կողմից Երևանը հայտարարվել է նաև 2015 թվականի ուսանողական մայրաքաղաք:

Այս երկու իրադարձությունները, Աշոտյանի գնահատմամբ, կրթական համակարգի միջազգայնացման համար ունեն կարևոր նշանակություն և կարող են պատմական դառնալ:

Քաղաքապետ Տարոն Մարգարյանը, կարևորելով Հայաստանի կրթական համակարգի ներգրավումը Եվրոպական կրթական տարածքին, ընդգծել է կրթության և գիտության նախարարության և անձնապես նախարար Արմեն Աշոտյանի ջանքերը Բոլոնիայի գործընթացի նախագահությունը ստանձնելու ուղղությամբ: «Երևանի համար մեծ պատիվ է դառնալ Եվրոպական կրթական տարածքի մայրաքաղաք: Մայրաքաղաքում անցկացվող ցանկացած միջոցառում մեզ համար կարևոր է, առավել ևս, եթե այն վերաբերում է կրթության ոլորտի ձեռքբերումներին»,- նշել է Տարոն Մարգարյանն ու վստահեցրե լ, որ Երևանի քաղաքապետարանը իր լիազորությունների շրջանակում կաջակցի նախարարական գագաթաժողովի աշխատանքներին:

Հանդիպման ավարտին ՀՀ ԿԳ նախարար Արմեն Աշոտյանն ու Երևանի քաղաքապետ Տարոն Մարգարյանն ստորագրել են փոխըմբռնման հուշագիր, համաձայն որի՝ կողմերը պարտավորվել են 2015թ. ՀՀ-ում Եվրոպական բարձրագույն կրթական տարածքի նախարարական գագաթաժողովի և Բոլոնիայի քաղաքականության 4-րդ ֆորումի անցկացման նպատակով զարգացնել գործակցությունն ու ընդլայնել համագործակցության շրջանակը: