Ռոբերտ Շտիգլիցի դեմ մենամարտին ընդառաջ. բացառիկ հարցազրույց Արթուր Աբրահամի հետ (ֆոտո)

Lurer.com-ը բացառիկ հարցազրույց է ունեցել հայ պրոֆեսիոնալ բռնցքամարտիկ Արթուր Աբրահամի հետ` Ռոբերտ Շտիգլիցի դեմ մենամարտին ընդառաջ: 

-Արթուր, ինչպե՞ս են ընթանում մենամարտի նախապատրաստական աշխատանքները:

-Ծանր ընթացան մենամարտի նախապատրաստական աշխատանքները' օրական երկու անգամ մինչև երեք ժամ պարապում էի Գերմանիայի Քինբաում մարզաառողջարանային քաղաքում: Սակայն չեմ դժգոհում, այդ ամենը միտված է իմ մեծ նպատակի իրականացմանը, այն է' հաղթել մարտի 1-ին և վերանվաճել աշխարհի չեմպիոնի տիտղոսը: Մարզիչս' Ուլլի Վեգները, ով սովորաբար դժգոհ է լինում իր մարզիկների մարզավիճակներից, ասում է, որ գոհ է ինձանից: Կարևորում եմ նրա կարծիքը:

-Երկրպագուների կողմից աջակցություն ստանո՞ւմ եք:

-Իհարկե: Երկրպագուների աջակցությունն ու քաջալերանքը զգում եմ ոչ միայն հենց մենամարտի ժամանակ, այլև դրանից առաջ: Բազմաթիվ քաջալերող նամակներ եմ ստանում թե' իմ կայքէջի' www.arthurabraham.de , թե' իմ ֆեյսբուքյան պաշտոնական էջի' www.facebook.com/arthurabraham փոստարկղերին: Շնորհակալ եմ իմ երկրպագուներին, որ միշտ ինձ հետ են, միշտ իմ կողքին են:

-Ինչպե՞ս կգնահատեք Ձեր' հաղթանակի շանսերը:

-Ինչպե՞ս գնահատեմ' ես եմ հաղթելու: Շտիգլիցի հետ մենամարտելու կրկնակի փորձ ունեմ, և սա կօգնի ինձ հաղթանակի հասնել:

-Ինչպե՞ս է Ձեր տրամադրությունը մարտից առաջ:

-Ինչպես միշտ' հաղթական: Դա շատ կարևոր է: Ֆիզիկական պատրաստվածությունից բացի' մարզիկը պետք է նաև հոգեպես պատրաստ լինի հաղթելու:

-Ինչպե՞ս կգնահատեք Շտիգլիցի հնարավորությունները:

-Շտիգլիցը բարձր մակարդակի մարզիկ է: Եկեք չմոռանանք, որ նա աշխարհի չեմպիոն է: Բայց կրկնում եմ' ես եմ հաղթելու:

-Ի՞նչ կմաղթեք մրցակցին:

-Մաղթում եմ, որ հնարավորինս շուտ նոկաուտ լինի:

-Հաղթանակի դեպքում ո՞ւմ կնվիրեք այն:

-Իմ ազգին' հայ ժողովրդին:

-Շտիգլիցի դեմ մենամարտից հետո այլ մենամարտ առաջիկայում նախատեսե՞լ եք:

-Դեռ վաղ է այդ մասին խոսելը, հաջորդ մենամարտերի մասին կհայտարարեմ այս մենամարտից հետո:

Հիշեցնենք, որ  Աբրահամը-Շտիգլից 3-րդ մենամարտը տեղի կունենա մարտի 1-ին, գերմանական Մագդեբուրգ քաղաքում: Աբրահամն ու Շտիգլիցն առաջին անգամ հանդիպել են 2012թ. օգոստոսի 25-ին, Բեռլինում: Արթուր Աբրահամը, մրցավարների միաձայն որոշմամբ միավորների առավելությամբ հաղթեց' նվաճելով Շտիգլիցին պատկանող աշխարհի չեմպիոնի տիտղոսը: Բռնցքամարտիկների միջև երկրորդ մենամարտը տեղի ունեցավ 2013 թ. մարտի 23-ին`Արթուր Աբրահամը ռևանշմենամարտում կորցրեց իր տիտղոսը:

Մարտի 1-ին կայանալիք մենամարտը կցուցադրվի գերմանական SAT 1 հեռուստաընկերության ուղիղ եթերում, նաև Հայաստանի հանրային հեռուստաընկերությամբ:

Զրուցեց` Լիանա Թորոսյանը