Մարտի մեկի հետ կապված` ՀՅԴ-ի հասցեին մեղադրանք չի կարող լինել. Աղվան Վարդանյան

Մարտի մեկի հետ կապված' ՀՅԴ-ի հասցեին մեղադրանք չի կարող լինել: Այս մասին այսօր Ազգային ժողովում` լրագրողների հետ հանդիպման ժամանակ, ասաց ՀՅԴ խմբկացության քարտուղար Աղվան Վարդանյանն՝ անդրադառնալով Ալեքսանդր Արզումանյանի հնչեցրած այն տեսակետին, թե «այսօր խորհրդարանում բացի «Ժառանգություն» ու ՀԱԿ խմբակություններից բոլորը Մարտի մեկի կոծկման մասնակից են»:

«Ճիշտ է` ժամանակն անցնում է, որոշ բաներ մոռացվում են, բայց ես որևէ փաստարկ, որևէ հիմք` ՀՅԴ-ին մեղադրելու, չեմ տեսնում:

Միակ դրվագը, որ խոսվել է, այն է, որ ՀՅԴ-ն Մարտի մեկից հետո կոալիցիայի մեջ է եղել, բայց սա բոլորովին այլ օպերա է, ես չեմ կարծում, որ պրն. Արզումանյանը…

Մենք երբեք միավորներ հավաքելու խնդրով չենք տառապել, մեր և տեսակը և մտածողությունը թուլ չեն տա, որ ՀՅԴ-ն անի բաներ, որ իրեն հարիր չեն, որոնք արհեստական ու շինծու են»,-ասաց Վարդանյանը:

Վերջինիս խոսքով՝ Նիկոյանի ղեկավարած հանձնաժողովում ՀՅԴ ներկայացուցիչն աշխատել է գիշեր-ցերեկ:

«Մեր մասով փորձել ենք բոլոր հարցերի պատասխանները գտնել, ՀՅԴ-ն եզրափակիչ արձանագրության մեջ հատուկ կարծիք է գրել, որ այս-այս հարցերը մնացել են բաց, ու մենք կողմ ենք, որ դրանք շարունակեն բացվել, թե որտեղ պետք է ՀՅԴ-ն կոծկելու մեջ մեղք ունենար, ես դա չեմ հասկանում»,-ասաց պատգամավորը:

Աղվան Վարդանյանի խոսքով՝ եթե պրն. Արզումանյանն իրենց կոծկելու մեջ է մեղադրել, ապա ինքը կարծում է՝ Արզումանյանը չարաչար սխալվել է: