Տխուր էր գարնան առաջին օրվա լուսաբացը. Մարտի մեկ... վեց տարի անց

Տիգրան Խաչատրյան, Զաքար Հովհաննիսյան, Գոռ Քլոյան, Հովհաննես Հովհաննիսյան, Գրիգոր Գևորգյան, Դավիթ Պետրոսյան, Արմեն Ֆարմանյան, Սամվել Հարությունյան, Տիգրան Աբգարյան, Համլետ Թադևոսյան. ՀՀ այս քաղաքացիները զոհվեցին Երևանի կենտրոնում` 2008թ. Մարտի 1-ին:

Լրանում է Երևանի կենտրոնում տեղի ունեցած ողբերգական իրադարձությունների 6-րդ տարելիցը:

2008-ի փետրվարի 19-ի նախագահական ընտրություններից հետո, պաշտոնական տվյալներով պարտություն կրած, ՀԱԿ առաջնորդ Լևոն Տեր-Պետրոսյանի գլխավորությամբ` սկսվեցին շուրջօրյա հանրահավաքներ, նստացույց: Ընդդիմությունը բողոքարկում էր ընտրությունների պաշտոնական արդյունքները, պահանջում արտահերթ ընտրություններ:

2008 թվական, փետրվարի 26... Լևոն Տեր-Պետրոսյանը հանրահավաք էր հրավիրել Ազատության հրապարակում:

Նույն օրը Հանրապետության հրապարակում հանրահավաք էր հրավիրել նաև պաշտոնական տվյալներով հաղթած թեկնածու Սերժ Սարգսյանը: Իշխանության հանրահավաքին «եկած» քաղաքացիները լքում էին Հանրապետության Հրապարակը և «Միացո՛ւմ, միացո՛ւմ», «Լևո՛ն, նախագահ» վանկարկումներով միանում էին Ազատության հրապարակում հավաքվածներին: Այդ օրը Ազատության հրապարակի ամենաբազմամարդ հանրահավաքն էր:

Երգ, պար, ելույթներ, կոչեր, հույզեր ու հույսեր...Շուրջօրյա հանրահավաքներ, նստացույցեր... ամեն ինչ մեկտեղվել էր Ազատության հրապարակում: Մարդիկ եկել էին Հայաստանի տարբեր մարզերից, տարբեր գյուղերից ու համայնքներից:

9 օր շարունակվող խաղաղ նստացույցից հետո՝ Մարտի 1-ի առավոտյան, ոստիկանությունն Ազատության հրապարակից ցրեց ցուցարարներին: Բողոքի ակցիան շարունակվեց Մյասնիկյանի արձանի հարևանությամբ, ինչին հաջորդեց բախումը ցուցարարների և ոստիկանության միջև:

Տխուր էր գարնան առաջին օրվա լուսաբացը, իսկ օրվա վերջը՝ ավելի դաժան։ Մարտի 1-ի երեկոյան սկսված և մարտի լույս 2-ի գիշերը շարունակված բախման հետևանքով զոհվեց 10 մարդ, այդ թվում՝ 2 զինվորական: Հայտարարվեց 20-օրյա արտակարգ դրություն, ձերբակալվեցին ընդդիմության հարյուրավոր ներկայացուցիչներ:

Անցել է արդեն 6 տարի, բայց դեռ բացահայտված չեն 10 զոհերի սպանության հանգամանքները, պատժված չեն սպանությունների մեղավորները:

Չնայած իշխանությունները հաճախ հայտարարում են, որ Մարտի 1-ի էջն արդեն փակված է, այնուամենայնիվ, ընդդիմությունն ու զոհերի հարազատները հայտարարում են, որ քանի դեռ մեղավորները չեն բացահայտվել և պատժվել, այդ էջը փակված համարել չի կարելի:

Հիշեցնենք, որ Մարտի 1-ին` ժամը 15:00-ին, Ազատության հրապարակում Հայ Ազգային Կոնգրեսը և Հայաստանի Ժողովրդական կուսակցությունը հրավիրում են հանրահավաք: Հանրահավաքից հետո տեղի կունենա երթ: 

 Օրակարգում

* Մարտի 1-ի բացահայտման և պատասխանատուների իրավական պատասխանատվության պահանջը

* Երկրում ստեղծված իրավիճակը և Սերժ Սարգսյանի հեռացման մեխանիզմները

* Կուտակային պարտադիր վճարների դեմ պայքարը

* Գազի, էլեկտրաէներգիայի և տրանսպորտի գնի հարցերը

* Արտաքին քաղաքական խնդիրներ

* Հայ Ազգային Կոնգրեսի հետագա անելիքները

Հանրահավաքում ելույթ կունենա ՀՀ առաջին նախագահ Լևոն Տեր-Պետրոսյանը:

Գայանե Համբարձումյան