Ֆրանսիան անհանգստություն է հայտնել Ղրիմում իրադրության սրվելու կապակցությամբ

Ֆրանսիան անհանգստություն է հայտնել Ղրիմում իրադրության զարգացման կապակցությամբ և լարվածությունը թուլացնելու կոչ է արել: Այդ մասին հայտարարել է Ֆրանսիայի արտաքին գործերի նախարարության պաշտոնական ներկայացուցիչ Ռոմեն Նադալը: Այս մասին տեղեկացնում է «Ուկրինֆորմ» գործակալությանը:

«Ղրիմում իրադրության զարգացումն անհանգստության առարկա է, մենք կոչ ենք անում թուլացնել լարվածությունը»,-նշել է նա:

Դիվանագետի խոսքով՝ Ֆրանսիայի իշխանությունը հետեւում է իրադրությանը և մշտական կապի մեջ է Ռուսաստանի և Ուկրաինայի իշխանությունների ներկայացուցիչների և Եվրոպական Միության իր գործընկերների հետ:

Նադալը հիշեցրել է նաև, որ Ֆրանսիայի արտաքին գործերի նախարար Լորան Ֆաբիուսը բազմիցս կոչ է արել պահպանել Ուկրաինայի միասնությունն ու տարածքային ամբողջականությունը, ինչպես նաև ձեռնպահ մնալ բռնություններից: