«Հրապարակ». Այսօրվա հանրահավաքը մարդաշատ և ուժգին պետք է լինի

Արմատական ընդդիմություն ՀԱԿ-ի նորաթուխ դաշնակիցներ ՀՅԴ-ն եւ ԲՀԿ-ն անհարմար վիճակում են հայտնվել եւ չգիտեն ինչպես ձեւակերպեն սպանդի տարելիցին իրենց մասնակցությունը: Մասնակցելու քաղաքական որոշում չեն կայացրել, ակնարկում են, որ յուրաքանչյուրի որոշելիքն է, ոմանք էլ արդեն «հերոսանում» են, թե՝ մենք որոշել ենք մասնակցել: Եթե մի քանի օր առաջ խորհրդարանում ընդդիմադիրների հետ ներկայացրել են մարտի 1-ի սպանությունների բացահայտման ժամանակավոր հանձնաժողով ստեղծելու պահանջը, ապա այսօր պարտավոր են նրանց հետ լինել դեպքի վայրում, որպեսզի արտառոց չլինի իրենց պահվածքը: Նրանց հետ կլինի նաեւ «Ժառանգությունը»: Այսօր կեսօրին ընդդիմադիրները նախ Ազատության հրապարակում կհավաքվեն, ապա երթով կշրջեն կենտրոնական փողոցներով: Այս երթը, ինչպեսեւ ողջ արարողությունը, մի բովանդակություն ունի՝ իշխանությանը ցուցադրել ուժ՝ կառավարությանն անվստահության հայտնելու ոչ խորհրդարանական ուժերի խմորումների ֆոնին: Այնպես որ, այն հնարավորինս մարդաշատ ու ուժգին պետք է լինի: Արդեն շրջանառվում են լուրեր, որ Կոտայքի մարզից մեծն բարեգործի ավտոբուսներով ժողովրդին կտեղափոխեն Երեւան՝ ողբերգության զոհերի հիշատակին «հարգանքի տուրք» մատուցելու:

2012-ից պատգամավոր դարձած ԲՀԿ-ական Ստեփան Մարգարյանը մեզ հետ զրույցում վստահեցրեց, որ ինքը մի քանի անգամ մասնակցել է. «Բայց եթե նախկինում էլ մասնակցած չլինեի, հիմա կգնայի»: Ինչո՞ւ, որքանո՞վ է ճիշտ, քաղաքական նեղ շահերից ելնելով, շահարկել ողբերգությունը, արդյո՞ք իշխանության նախկին աջակիցների մասնակցությունն արդեն անարգանք չէ զոհերի հիշատակին: «Ես վստահ չեմ, որ նախկինում չեն եղել, ես գիտեմ մարդիկ, որ եղել են, բայց եթե կան մարդիկ, որոնք չեն եղել, ապա Ձեր ասած անարգանքը կլինի, թե ինչու չեն եղել: Երկու տարբերակ կա՝ նախ հանրահավաք գնալու սովորություն չունեն եւ քաղաքում չեն եղել, դրա համար բոլոր դեպքերում ես կարծում եմ, որ գնալը ճիշտ է, եթե նույնիսկ նախկինում չեն գնացել: Հատկապես հանձնաժողով ստեղծելու ցանկության ֆոնին»: Ի վերջո, հանրության ու զոհերի ծնողների, ընտանիքների, հարազատների առջեւ ներկայանում է երկու ուժ, որոնցից մեկը նախկինում մյուսին հրապարակավ մեղադրում էր անմիջական մասնակցության մեջ: Մարգարյանը հիշողությունը քրքրեց ու գտավ, որ ընդամենը հանրահավաքում ՀԱԿ առաջնորդը ԲՀԿ-ին մեղադրել է միայն այն բանում, որ նա կոալիցիայի անդամ է եղել, այլ հայտարարություն չի եղել: Թե ինչու չի եղել, դա Կոնգրեսից պետք է հարցնել. «Եվ դրա համար է, որ ԲՀԿ-ն պնդում է՝ եկեք հանձնաժողով ստեղծենք, որ հասկանանք՝ ով ինչ չափի պատասխանատվություն է կրել, եւ ամեն մեկն իր չափով պատասխան տա»: ԲՀԿ-ի պատասխանատվությունը Մարտի 1-ի հարցում թերեւս այսքան չէր հիշվի, եթե նրանք իսկապես միավորվեին իշխանության դեմ, այլ ոչ թե հանուն վարչապետի աթոռի պայքարի իմիտացիա անեին ու պարբերաբար խաբեին ՀՀ քաղաքացիներին:

Շարունակությունը` «Հրապարակ» օրաթերթի այսօրվա համարում: