«ՀԺ». «ՀՀ ոստիկանությունը ցույց է տվել, թե որն է իր գոյության հիմնական նպատակը»

Իրեն ՀՀ ոստիկանություն համարող կազմակերպությունը երեկ հերթական անգամ ցույց է տվել, թե որն է իր գոյության հիմնական նպատակը: Երեկ առավոտյան 5 ոստիկաններ այցելել են քաղաքացիական ակտիվիստներից մեկի բնակարան եւ խուզարկել այն: Խուզարկելու անհրաժեշտությունը նրանք պատճառաբանել են նրանով, թե մեկ ամիս առաջ մի ինչ-որ բնակարանում գողություն է եղել: Մի երջանիկ զուգադիպությամբ էլ, երեկ հրապարակվել է այս տարվա հունվարին Հայաստանում գրանցված հանցագործությունների պաշտոնական վիճակագրությունը, որի համաձայն, անցած տարվա նույն ժամանակահատվածի համեմատ հանցագործությունների թիվը աճել է 33 տոկոսով:

Ընդ որում, հատկապես մեծ է «ծանր» որակվող հանցագործությունների թվի աճը, որը կազմել է ավելի քան 71 տոկոս: Ուշագրավ է, որ վերջին տարիներին Հայաստանում արձանագրվում է հանցագործությունների թվի կայուն աճ, ինչը առաջին հերթին պայմանավորված է հենց ոստիկանության գործունեությամբ: Իսկ ոստիկանությունը հանցագործությունների դեմ պայքարելու փոխարեն հիմնականում զբաղված է ոչ ցանկալի անձանց դեմ հետապնդումներ կազմակերպելով: Եւ այդ հետապնդումների ցինիզմը գնալով ավելի ու ավելի է խորանում, ինչի ապացույցը երեկվա խուզարկությունն էր: Ի դեպ, ոստիկանները ունեցել են դատարանի որոշում' խուզարկություն կատարելու թույլտվություն տալու մասին, ինչը տարօրինակ չէ. դատարանները Հայաստանում ոստիկանական ստորաբաժանումների կարգավիճակ ունեն: Այս պայմաններում հանցագործությունները բնականաբար պետք է աճեն:

Շարունակությունը` «Հայկական Ժամանակ» օրաթերթի այսօրվա համարում: