Գերագույն ռադան դիմել է ԱՄՆ-ին և Մեծ Բրիտանիային` երաշխավորելու Ուկրաինայի անվտանգությունը

Ուկրաինայի Գերագույն ռադան լիագումար նիստի ժամանակ որոշել է դիմել Բուդապեշտի հուշագիրն ստորագրած անդամ երկրներին' Ղրիմում տեղի ունեցող վերջին զարգացումներով պայմանավորված, խնդրելով երաշխավորել երկրի անվտանգությունը: Այս մասին հայտնում է itar-tass-ը:

Պատգամավորները նաև կոչով դիմել են Ռուսաստանին' հորդորելով դադարեցնել Ուկրաինայի տարածքային ամբողջականությանն սպառնացող գործողությունները:

Նույն լիագումար նիստի ժամանակ խորհրդարանականներն օրենք են ընդունել Գերագույն ռադայի պատգամավորներին տրվող արտոնությունների վերացման մասին: Փետրվարի 28-ի գիշերը Պենտագոնի ղեկավարը հայտարարել էր, որ ԱՄՆ-ն Ուկրաինայում տիրող իրավիճակի շուրջ Ռուսաստանի հետ ունեցած տարաձայնությունները մտադիր է հաղթահարել դիվանագիտական ուղիներով: «Մենք փորձում ենք գործել' ուշադրության կենտրոնում պահելով դիվանագիտությունը: Դա ճիշտ և պատասխանատու մոտեցում է»,-CBS հեռուստատեսությանը տված հարցազրույցում ասել է Պենտագոնի ղեկավար Չաք Հեյգելը:

Միաժամանակ, ԱՄՆ ներքին գործերի նախարարը կարծիք է հայտնել, որ իրադարձությունների «սադրիչ կերպով զարգացման» պարագայում Ուկրաինայում կարող է «շատ վտանգավոր իրավիճակ» ստեղծվել:

1994-ի Բուդապեշտի հուշագրով Ուկրաինայի ինքնիշխանության, անկախության և տարածքային ամբողջականության երաշխավորներն են ԱՄՆ-ն, Մեծ Բրիտանիան և Ռուսաստանը: Ուկրաինայի համար որևէ ռազմական սպառնալիք ստեղծվելու դեպքում այդ տերությունները ՄԱԿ-ի Անվտանգության խորհուրդ են տեղափոխում խնդիրը և պաշտպանում են Ուկրաինայի անկախությունն ու տարածքային ամբողջականությունը: