Իշխանություններին փող է պետք` շատ և միանգամից. Վահագն Խաչատրյան

Վեց տարի առաջ այս օրը ՀՀ իշխանությունները որոշեցին օգտվել զենքի ուժով իշխանությունը պահելու հնարավորությունից, ինչի արդյունքում տասը անմեղ անձ զոհվեց: Այս մասին այսօր` Ազատության հրապարակում, ասաց Վահագն Խաչատրյանը:

Վերջինիս խոսքով` այս իշխանությունները ՀՀ-ն տարան կործանման, քանի որ վերջին վեց տարվա ընթացքում ՀՀ-ից 246.000 մարդ հեռացավ: Բացի այդ, Հայաստանն իր պետական պարտքը հասցրեց 2.4 միլիարդ դոլարով:

«Փոքր և միջին բիզնեսը շնչահեղձ է լինում: Գիշերը քնում, առավոտյան արթնանում են` մարդկանց թալանելու, կեղեքելու նոր ձևերի փնտրտուքով:

Պարզվում է` ըստ ՀԲ-ի հրապարակած փաստաթղթի, Հայաստանից անօրինական ճանապարհով խոշոր չափի գումարներ են դուրս եկել»:

Վարդան Խաչատրյանի խոսքով`ինչքան էլ քաղաքացիական նախաձեռնության մասնակիցները փորձում են բանակցությունների արդյունքով հասնեն կուտակային կենսաթոշակային համակարգի բարելավման, պարտադիրի վերացմանը, այնքան ճնշումները խստացվում են, քանի որ իշխանություններին պետք է փող` շատ և միանգամից:

Այսօրվա իշխանությունը հավերժ չէ, և ուժ չունեն այս փտած և վարկաբեկված իշխանությունը պահելու, միայն զենքով և ուժով: Դուրս գալու մի ճանապարհ կա` պարտադրել այս հակապետական իշխանական համակարգին խաղաղ ճանապարհով հեռանալ: ՀՀ քաղաքացուն թույլ տալ իրականացնել իր սահմանադրական իրավունքը` արդար ընտրությունների շնորհիվ ձևավորել իշխանություն: