Արմավիրում կտեղադրվի հակակարկտային 50 կայան. վարչապետն այցելեց մարզ

Հայաստան 1 Մարտ, 2014 16:35

Առաջիկայում հանրապետությունում կներդրվի հակակարկտային 80 նոր կայան, որից 50-ը՝ Արմավիրի մարզում: Այդ մասին ՀՀ վարչապետ Տիգրան Սարգսյանի՝ Արմավիրի մարզ կատարած այցի ընթացքում տեղեկացրեց ՀՀ արտակարգ իրավիճակների նախարար Արմեն Երիցյանը: Վարչապետը ծանոթացավ Արշալույս և Ակնալիճ համայնքների մերձակայքում գտնվող հակակարկտային կայանի աշխատանքներին: Հակակակարկտային նոր կայանները ձեռք են բերվել ՀՀ պետական բյուջեից հատկացված միջոցներով, որոնցից յուրաքանչյուրն արժե 3,5 մլն դրամ: «Ընդհանուր առմամբ Հայաստանում ապրիլի 15-ից կունենանք 442 հակակարկտային համակարգ և կկարողանանք ներազդել կարկտաբեր ամպերի վրա: Չնայած դրան, դեռ անելիքներ ունենք, որովհետև մեր տարածքի միայն 10-12 տոկոսն են ծածկում այդ կայանները: Բայց դա շարունակական աշխատանք է, որը հանձնարարվել է ՀՀ վարչապետի կողմից»,-ասաց ՀՀ ԱԻ նախարարը:

Ըստ Արմեն Երիցյանի՝ ողջ հանրապետությունը ծածկելու համար անհրաժեշտ է 4 հազարից ավելի հակակարկտային համակարգ: Կայանների ներդրման արդյունքում Արմավիրի մարզում կլինի հակակարկտային 161 կայան, ինչն էապես կուժեղացնի կարկտաբեր ամպերից պաշտպանվածությունը: Նախարարը նշեց, որ մասնավորի և պետության կողմից տեղադրված կայանները կառավարվելու են մեկ միասնական կենտրոնից՝ ՀՀ ԱԻՆ հակաճգնաժամային կենտրոնից: Խնդիրը գտնվում է նաև ՀՀ նախագահի ուշադրության կենտրոնում և կատարվող աշխատանքների մասին պարբերաբար զեկուցվում է:

Տիգրան Սարգսյանը և ՀՀ գյուղատնտեսության նախարար Սերգո Կարապետյանը հանդիպեցին նաև խաղողի այգիներում գյուղատնտեսական աշխատանքներ իրականացնող արմավիրցիներին: «Պետությունը շարունակելու է սուբսիդավորել պարարատանյութի, դիզվառելիքի, սերմնացուի գինը, որն էապես ցածր է լինելու շուկայական գնից»,-ասաց ՀՀ վարչապետը:

Գյուղացիները բարձրացին հատկապես ոռոգման ջրի հարցը՝ նշելով, որ այն բավականին բարձր է իրենց համար, հատկապես, որ Ակնալիճ համայնքի հողի տեսակն այնպիսին է, որ պահանջվում է մի քանի անգամ ավելի ջուր, քան մյուս համայնքներում:

Տիգրան Սարգսյանն այցելեց Ակնալիճ համայնքի սոցիալապես անապահով ընտանիքներից մեկի բնակարան: Վարչապետը տարբեր նվերներ էր պատրաստել ընտանիքի համար: Տիգրան Սարգսյանը հանձնարարեց ՀՀ աշխատանքի և սոցիալական հարցերի նախարար Արտեմ Ասատրյանին՝ 4 ուսանող ունեցող ընտանիքին ներգրավել համապատասխան սոցիալական ծրագրերում:

Նախորդ տարի գարնանը Արմավիրում կարկտահարությունը գյուղացիներին պատճառել էր մեծածավալ վնասներ։ Պետությունը փոխհատուցել էր նրանց հողահարկը և ջրի վարձը, տրամադրել սերմնացու, պարարտանյութ, դիզվառելիք, ինչպես նաև դրամական միանվագ օգնություն: