Մարինե Պետրոսյանի ժպիտ առաջացնող հետազոտությունը

Այսօր համացանցում տիկին Մարինե Պետրոսյանի կողմից տարածվել է լրատվամիջոցների ցուցակ, որոնք իբրև թե մեկնաբանությոններ ստանալու համար ՀՀԿ խոսնակ, ԱԺ փոխնախագահ Էդուարդ Շարմազանովին զանգահարելու փոխարեն դրանք ստանում են պատրաստ վիճակում՝ էլ. փոստի միջոցով: Կցված են լուսապատճեններ, որտեղ ցուցադրված է մեկնաբանությունների տեքստերի նմանությունը: Ցուցակում, չգիտես ում բութ մատից հոտոտելով գուշակություններ անելու ունակությունից ելնելով, ներառված է նաև Lurer.com-ի անունը:

Հրապարակման համար, հավանաբար, հիմք է հանդիսացել ՀՀԿ լրատվության պատասխանատուների կողմից լրատվամիջոցներին ուղարկված տեքստերի լուսապատճենը, որտեղ slaq.am, asekose.am, haynews.am, panorama.am, times.am, shamshyan.com կայքերի էլեկտրոնային փոստի հասցեների կողքին նշված է նաև մեր կայքի էլ. փոստի հասցեն: Սակայն նյութերի լուսապատճեններում երևում են ոչ միայն վերոհիշյալ ցուցակում ընդգրկված լրատվամիջոցների հրապարակումները, այլև ավելացված են tert.am, news.am, aravot.am, hraparak.am, 168.am, blognews.am, 1in.am կայքերի հրապարակումները, որոնց էլ. հասցեները հրապարակված լուսապատճենում գոյություն չունեն, այսինքն չեն ստացել հաղորդագրություն էլ. փոստով, բայց Շարմազանովի մեկնաբանությունները տեղադրել են իրենց կայքերում: Ստացվում է ծիծաղելի իրավիճակ, հետազոտողը հրապարակում է նկարներ, որտեղ վերոհիշյալ հրապարակումները տեղադրել են այնպիսի կայքեր, որոնք ցուցակից բացակայում են, սակայն չի նշում, որ lurer.com-ը, չնայած այն հանգամանքին, որ պաշտոնապես ստացել է հաղորդագրություն՝ չի տեղադրել:

Մենք օրական տասնյակ հաղորդագրություններ ենք ստանում գրեթե բոլոր քաղաքական ուժերից և բնական ու տրամաբանական է, որ մեր էլ. փոստի հասցեն տեղ է գտել բոլոր կուսակցությունների պահոցներում: Եթե Մարինե Պետրոսյանի նպատակը հանուն ազատ խոսքի համար անխոնջ պայքարն էր, իր կես հեկտարանոց տեքստում պետք է տեղ գտներ երկու տողի համար և արդարության համար նշեր, որ lurer.com կայքը, չնայած ստացել է, սակայն չի տեղադրել այդ հաղորդագրությունը: Դա էր պահանջում օբյեկտիվությունն ու էթիկայի տարրական կանոնները:

Լրատվամիջոցը չի կարող պահանջել լրագրողից՝ լինել արդար և օբյեկտիվ, որովհետև դա պետք է նրա արժեքային համակարգի մասը լիներ...

Տարրական բարեխղճությունը պահանջում էր պարզապես ցեխ չշպրտել մի լրատվամիջոցի հասցեին, որը տարիներ շարունակ եղել և մնում է ֆինանսապես և քաղաքականապես անկախ բոլոր կենտրոններից: Մենք բազմաթիվ էլեկտրոնային հաղորդագրություններ ենք ստանում և ընդդիմադիր, և իշխանական քաղաքական ուժերից, որոնք ներկայացվում են հավասար լուսաբանման և անաչառության սկզբունքով՝ ելնելով բացառապես հասարակությանը ճշգրիտ և ամբողջական տեղեկատվություն տրամադրելու մեր գործելաոճից:

Տարիներ շարունակ մեր լրատվամիջոցը եղել և մնում է ազատ հարթակ բոլոր քաղաքական ուժերի, քաղաքացիական խմբերի և սոցիալական շարժումների համար, և մեր նկատմամբ իրականացվող գեբելսյան հակաքարոզչությունը, մեղմ ասած, անազնիվ է և ծիծաղ առաջացնող: Ժողովրդական ասացվածքը հետաքրքիր խորհուրդ ունի՝ որ աղբյուրից մարդ ջուր խմի, այն աղբյուրին քար չի գցի...

Հիմք ընդունելով այդ իրականությանը չհամապատասխանող հոդվածը՝ հարց է առաջանում՝ ում բութ գործիքն է հանդիսանում այս «վերլուծության» հեղինակը...

Վերջում ցանկանում ենք մաղթել բոլոր լրատվամիջոցներին, ինչպես նաև «անկախ» հետազոտողներին, որ լինեն նույնքան անկողմնակալ և անկախ, որքան lurer.com-ն է: