Մահացել է ֆրանսիացի կինոռեժիսոր Ալեն Ռենեն

Կյանքի 91-րդ տարում Փարիզում մահացել է հայտնի ֆրանսիացի ռեժիսոր և դերասան Ալեն Ռենեն: Ինչպես տեղեկացնում է ԻՏԱՌ-ՏԱՍՍ-ը, այս մասին հայտնել են Ռենեի հարազատները: «Ռենեն վերջին տարիներին իրեն վատ ինքնազգացողություն ուներ և այլևս չէր կարողանում աշխատել կինոյի ասպարեզում»,-ասել է Կաննի միջազգային կինոփառատոնի գեղարվեստական ղեկավար Թիերի Ֆրեմոն:

Ռենեի վաղ տարիների աշխատությունները դասվում են ֆրանսիական հայտնի «նոր ալիքի» շրջանին: Սակայն ռեժիսորին միջազգային ճանաչում են բերել երեք կինոնկարներ, որոնք ունեն ռոմանտիկ և ռեալիստական ուղղվածություն' «Հերոսիմա' իմ սեր», «Գիշեր և մառախուղ», «Անցյալ տարի Մարիենբադում»: Ընդհանուր առմամբ, Ռենեն հեղինակել է ավելի քան քսան գեղարվեստական և մի քանի վավերագրական կինոնկարներ: Կինոռեժիսորն արժանացել է բազմաթիվ մրցանակների: Մասնավորապես, «Նախախնամություն» և «Հին երգ» ֆիլմերի համար արժանացել է Սեզար կինոփառատոնի գլխավոր մրցանակին, «Իմ ամերիկացի քեռին» ֆիլմի համար ստացել է Կաննի կինոփառատոնի Գրան Պրի մրցանակը, իսկ «Ծխել, չծխել» ֆիլմի համար' Բեռլինյան փառատոնի մրցանակը: