Կոտայքում հայտնաբերվել է բրուցելյոզով հիվանդ 38 գլուխ խոշոր եղջերավոր անասուն

Սննդամթերքի անվտանգության պետական ծառայությունը մարտի 1-ից հանրապետությունում իրականացնում է խոշոր եղջերավոր անասունների ստուգումներ: Ստուգումների ժամանակ Կոտայքի մարզի Ձորաղբյուր գյուղում հայտնաբերվել է բրուցելյոզով հիվանդ 38 գլուխ խոշոր եղջերավոր անասուն: Այս մասին «Արմենպրես»-ի հետ զրույցում տեղեկացրեց ՀՀ գյուղատնտեսության նախարարության Սննդամթերքի անվտանգության պետական ծառայության մամուլի խոսնակ Արմինե Սուքիասյանը: «Այս պահին կատարվում է սանիտարական սպանդ։ Որոշ անասուններ մորթվել են, որոշներն էլ պետք է մորթվեն։ Ստուգումները կշարունակվեն մինչ մարտի վերջ»,-ասաց նա:

Հայտնի են բրուցելաների 6 տեսակ, որոնք բաժանվում են մի շարք կենսաբանական տարբերակների: Առկա են ոչխարների, այծերի, խոշոր եղջերավոր անասունների, յակերի, գոմեշների, ուղտերի, ձիերի, խոզերի, խոյերի, շների, առնետների, ինչպես նաև մարդկանց հարուցիչներ:

Բրուցելաների կայունությունը ցածր է ֆիզիկական և քիմիական գործոնների նկատմամբ: 60oC պայմաններում ոչնչանում են 30 րոպեում, 70oC-ում՝ 5-10 րոպեում, 90-100oC-ում՝ անմիջապես: Պանրի, յուղի, աղացած կաշվի մեջ մանրէները պահպանվում են 67 օր, աղացած մսի մեջ՝ մինչև 3 ամիս, սառեցրած մսի մեջ և բրդի վրա՝ մինչև 5 ամիս: Հողում, ջրում, գոմաղբում, կոշտ կերերի մեջ հարուցիչը կարող է իր կենսունակությունը պահպանել մինչև 4 ամիս, սակայն արևի ուղիղ ճառագայթները մանրէասպան են 3-4 ժամվա ընթացքում: Հարուցիչի մանրէները կրեոլինի, ֆենոլի, ֆորմալդեհիդի 1%-անոց լուծույթների ազդեցությունից ոչնչանում են 1 ժամում, իսկ 5%-անոց թարմ հանգած կրի լուծույթից՝ 2 ժամում: Բրուցելյոզի նկատմամբ ընկալունակ են գյուղատնտեսական և ընտանի բոլոր կենդանիները, ինչպես նաև բրուցելաների առանձին տեսակներ փոխանցվում են մեկ կենդանական տեսակից մյուսին:

Խոշոր եղջերավոր անասունների պլանային ստուգումներն իրականացվում են տարեկան երկու անգամ՝ գարնանը եւ աշնանը: Մանր եւ միջին եղջերավոր անասունների ստուգումները տարվա ընթացքում կատարվում են մեկ անգամ: