Սամվել Մարտիրոսյանը ստեղծել է «Հայկական կայքերի փնտրտուք» որոնողական նոր համակարգը

Տեղեկատվական անվտանգության մասնագետ Սամվել Մարտիրոսյանը «Google» որոնողական համակարգի վրա ստեղծել է հայկական լրատվական մի շարք կայքերում փնտրող համակարգ: Այդ համակարգում ներառված են չորս տասնյակին մոտ հայկական լրատվական կայքեր:

Սամվել Մարտիրոսյանի ներկայացմամբ` որոնողական նոր համակարգում հնարավոր կլինի փնտրել միայն նորություններ և լուսանկարներ։ Նորությունները ֆիքսված են այնպես, որ որոնման արդյունքում գալիս են` ըստ ժամանակի, այսինքն` առաջինը բերում է այն նյութը, որը եղել է ամենավերջինը, հետո մյուսը և այլն։ Աջ անկյունից կարելի է փոխել և ընտրել` ըստ ամենահամապատասխանող նյութի (relevance): Այդ դեպքում` «Google»-ը կելնի իր ալգորիթմներից և կընտրի լավագույն նորությունը, որը կարող է շատ հին լինել։ Լուսանկարների բաժնում հակառակն է, նախնական դրված է` ըստ համապատասխանության, աջից կարելի է ընտրել ըստ ժամանակի: Որոնողական համակարգ մուտք գործելու համար պետք է օգտագործել այս հղումները` Bit.ly/mamul և Kg.am/mamul: Այս համակարգում ներգրավված կայքը պետք է համապատասխանի մի շարք չափանիշների: