ԱԺ մշտական հանձնաժողովում քննարկվել է համայնքների խոշորացման ծրագիրը

ԱԺ տարածքային կառավարման եւ տեղական ինքնակառավարման հարցերի մշտական հանձնաժողովը Ստեփան Մարգարյանի նախագահությամբ մարտի 3-ին տեղի ունեցած նիստում քննարկել է հանրապետությունում համայնքների խոշորացման վերաբերյալ կառավարության մոտեցումները: Ինչպես «Արմենպրես»-ին տեղեկացրին ՀՀ ԱԺ հասարակայնության եւ տեղեկատվության միջոցների հետ կապերի վարչությունից, Ստեփան Մարգարյանը տեղեկացրել է, որ կառավարությունն արդեն ընտրել է համայնքների խոշորացման վերաբերյալ մոդելները: Մշակվում է հայեցակարգ, որը առաջիկայում կներկայացվի խորհրդարանի քննարկմանը:

Ստեփան Մարգարյանի տեղեկություններով, համայնքների խոշորացման վերաբերյալ հարցին համայնքապետերի, ինչպես նաեւ տեղական բնակչության կարծիքները միանշանակ չեն. մասնավորապես, համայնքապետերը դժգոհություններ ունեն: Իսկ թե ինչ են մտածում այս առնչությամբ համայնքների բնակիչները, ինչ մտահոգություններ ու առաջարկներ ունեն, հանձնաժողովը կփորձի պարզել առաջիկա ամիսներին նախատեսված արտագնա այցերի ընթացքում:

ԱՄՆ Միջազգային զարգացման գործակալության կողմից ֆինանսավորվող «Հայաստանի Ազգային Ժողովին աջակցման ծրագրի» փորձագետ Վահան Մովսիսյանը հանձնաժողովին է ներկայացրել ՀՀ կառավարությունում քննարկվող «Փնջային» եւ «Շրջանային» անվանումներն ստացած մոդելները, դրանց առանձնահատկություններն ու միջազգային փորձը, ներդրման արդյունքում սպասվելիք արդյունքները: «Փնջային» մոդելը մատուցվող ծառայությունների քանակի եւ աշխարհագրության ընդլայնումն է, ներկա պահին օրենքով ամրագրված պարտադիր լիազորությունների ամբողջ (հիմնական) ծավալի իրականացումը: «Շրջանային» մոդելն ընդգրկում է «փնջային» խոշորացումն ամբողջությամբ եւ ներառում է մեկ կամ մի քանի փնջեր` հնարավորություն տալով համայնքներին փոխանցելու նոր լիազորություններ: Մոդելների ընտրության ժամանակ հաշվի են առնվել աշխարհագրական եւ ռելիեֆային յուրահատկությունները: Կառավարությունը այժմ մշակում է փնջային խոշորացման հայեցակարգը, իսկ շրջանային խոշորացումը, ըստ կառավարության, դեռ վաղ է:

Հանձնաժողովի նախագահ Ստեփան Մարգարյանը տեղեկացրել է, որ այս, ինչպես նաեւ այլ հարցերի կապակցությամբ գարնանային նստաշրջանի ընթացքում կկազմակերպվեն խորհրդարանական լսումներ եւ քննարկումներ: Քննարկվել են նաեւ հանձնաժողովի աշխատանքին վերաբերող այլ հարցեր: