«Հրապարակ». Գործազուրկ երիտասարդներից մինչև «դեպորտ արված խոպանչիներ». ընտրություններ Լոռու մարզում

Լոռու մարզի մի շարք համայնքներում մարտի 9-ին համայնքի ղեկավարի ընտրություններ են նշանակված: Թեկնածուների ցանկն ուշագրավ է՝ մտորումների տեղիք տվող: Գյուղական համայնքների մեծ մասում գյուղապետի թեկնածուներ են առաջադրվել գործազուրկ երիտասարդներից մինչեւ «դեպորտ արված խոպանչիներ»: Ու եթե այս ամենին էլ գումարենք այն հանգամանքը, որ գյուղերում ավելի շատ ընտրում են ոչ թե կոնկրետ գյուղապետի, այլ ազգական-բարեկամի, եւ, որպես կանոն, ամենամեծ ազգուտակը հաղթող է դուրս գալիս, ապա արդյունքների եւ գյուղի ապագայի մասին խոսելն անգամ ավելորդ է:

Լոռու մարզի Սպիտակի տարածաշրջանի Լեռնավան համայնքում գյուղապետի թեկնածու են առաջադրվել համայնքի գործող ղեկավար Վաչագան Վարդանյանը, Նորիկ Ավագյանը, Արման Գասպարյանը, նաեւ համայնքի ղեկավարի նախկին պաշտոնակատար Ռազմիկ Գեւորգյանը: Գյուղապետի թեկնածու Նորիկ Ավագյանն արդեն իսկ սկսել է նախընտրական քարոզչությունը, սակայն առանց բուկլետների ու պաստառների: Թեկնածուի խոսքով, գյուղում իրեն բոլորն են ճանաչում՝ բուկլետի ու պաստառի կարիք բացարձակ չկա: Չնայած մոտալուտ ընտրության օրվան, Լեռնավանում ամեն ինչ հանգիստ է: Առաջադրված թեկնածուներից երկուսն իրար ազգական են, ընտանիքի մի մասը մի թեկնածուի է ձայն տալու, մյուս մասը՝ մեկ այլ թեկնածուի: Գործող գյուղապետ, գյուղապետի թեկնածու Վաչագան Վարդանյանի հետ մեզ հանդիպել չհաջողվեց, զրուցեցինք աշխատակազմի քարտուղար Հրաչյա Պարսամյանի հետ: Վերջինս նախ խոսեց համայնքի խնդիրների ու արված աշխատանքների մասին, հետո արդեն՝ նախընտրական վիճակի ու իր ղեկավարի շանսերի: Նա փոքր բնակչություն ունեցող գյուղի գյուղապետի համար առաջադրված թեկնածուների թիվը բացատրում է հետեւյալ կերպ. «Շատերն ասում են՝ գործ չկա դրսում, դեպորտ են արել, ես էլ թեկնածությունս եմ դրել…»: Աշխատակազմի քարտուղարը չժխտեց, որ գյուղում ավելի շատ ընտրում են ոչ թե կոնկրետ անձի՝ գյուղապետի, այլ իրենց ազգակցին, եւ, հետեւաբար, ով ավելի շատ բարեկամ ունի, նա էլ կանցնի: «Այո, ով մեծ ազգ ունի, նա էլ կանցնի»,-ասաց նա, մանրամասնելով, որ ավելի մեծ ազգուտակ ունի գործող գյուղապետը:

Շարունակությւոնը` «Հրապարակ»-ի այսօրվա համարում: