«Մեզ չափազանց ոգևորում է դեղագործության ոլորտը». Տիգրան Սարգսյան

Հայաստանում դեղագործական ոլորտի զարգացման հարցում պետություն-մասնավոր համագործակցության փորձն անհրաժեշտ է ցույց տալ մասնավոր հատվածին` նրա մոտ այդ եղանակով առաջ շարժվելու վստահություն ձևավորելու համար:

Այդ մասին մարտի 4-ին նշեց ՀՀ վարչապետ Տիգրան Սարգսյանը Հայաստանի ազգային մրցունակության հինգերորդ զեկույցի ներկայացմանը նվիրված միջոցառմանը: «Մեզ չափազանց ոգևորում է դեղագործության ոլորտը, որտեղ արտահանման ծավալները հետևողականորեն տարեկան 35 տոկոսի աճ են տալիս: Տեսնում ենք, որ մասնավոր ընկերությունները համարձակ ներդրումներ են կատարում, տեսնում ենք, որ գրագետ մենեջմենթ կա, միջազգային ստանդարտներ են ներդրվում, նոր շուկաներ են բացահայտվում, և այս փորձը, մենք բնականաբար, պետք է դարձնենք տեսանելի մասնավոր հատվածի համար, որպեսզի նաև լինի վստահություն, որ պետություն - մասնավոր համագործակցության պլատֆորմի վրա մենք կարող ենք գնալ առաջ»,- նշեց վարչապետը: Տիգրան Սարգսյանն ընգծեց, որ Կառավարությունը հիմնականում աջակցում է միջին չափի ձեռնարկություններին, ինչը քաղաքական առումով համընկնում է առկա առաջնահերթություններին:

Հայաստանում դեղարտադրության ոլորտը վերջին տարիներին բուռն զարգացում է ապրում: 2013 թվականի վերջին «Լիկվոր» դեղագործական ընկերությունը ստացավ ոլորտի առաջին՝ Պատշաճ արտադրական գործունեություն (ՊԱԳ-GMP) հավաստագիր: