Հայկ Բաբուխանյանը ցավում է Ուկրաինայում տիրող իրավիճակի համար

Ազգային ժողովի ՀՀԿ խմբակցության պատգամավոր Հայկ Բաբուխանյանը ցավում է Ուկրաինայում տեղի ունեցող դեպքերի համար: Մարտի 4-ին լրագրողների հետ հանդիպմանը պատգամավորը հիշեցրեց, որ հայ-ուկրաինական բարեկամությունը դարերի պատմություն ունի: «Մենք չենք մոռացել, որ Ուկրաինայի ժողովուրդը ձեռք մեկնեց մեզ Սպիտակի երկրաշարժի ժամանակ, մենք նրանց՝ Չեռնոբիլի դեպքերի ժամանակ»,- նշեց Բաբուխանյանը:

Պատգամավորը հիշեցրեց նաև, որ երկրորդ համաշխարհային պատերազմի տարիներին ուկրաինական հողերի ազատագրմանը մասնակցել են նաև հայկական զորամիավորումներ: «Եվ, բնականաբար մենք չենք կարող հանգիստ վերաբերվել այն հանգամանքին, որ նաև մեր պապերի ջանքերով նացիստական ուժերից ազատագրված հողերում հիմա նման դեպքեր են տեղի ունենում»,- ասաց նա:

Բաբուխանյանի խոսքով` Ուկրաինայում կրկին ի հայտ են եկել նացիստական ուժեր, ովքեր փորձում են զավթել իշխանությունը: Նա նշեց, որ ներկայումս իրենց Ուկրաինայի կառավարություն և նախագահ հռչակածներին ոչ ոք չի ընտրել: «Ուկրաինայում հեղաշրջում իրականացրեցին մարդիկ, ովքեր պարբերաբար խախտում են ժողովրդավարության նորմերը. փակվում են այլախոհ լրատվամիջոցներ, պաշտոնյաներ են ազատվում աշխատանքից, հարձակման թիրախ են դառնում կրոնական հաստատությունները, խախտվում են ազգային փոքրամասնությունների իրավունքները»,- ասաց նա:

Արդեն երեք ամիս է, ինչ Ուկրաինան հայտնվել է աշխարհի ուշադրության կենտրոնում: Կիեւում մեկնարկած բողոքի ցույցերը տարածվեցին ողջ երկրով մեկ, եւ Ուկրաինան այժմ քաղաքացիական պատերազմի շեմին է: Ստեղծված քաոսի պայմաններում զոհերի թիվն օրեցօր շատանում է: Քաոսային վիճակ է նաեւ Ղրիմում, որտեղ միմյանց են բախվել ռուսամետ եւ եվրոպամետ տեսակետների ներկայացուցիչները: