Հայ գրողները զորակցություն են հայտնում Սևան Նիշանյանին

Հայաստանի գրողների միության մի շարք անդամներ իրենց զորակցությունը հայտնեցին Թուրքիայի բանտերից մեկում գտնվող քաղբանտարկյալ, պոլսահայ գրող, լեզվաբան Սևան Նիշանյանին: Իր քաղաքական հայացքների համար բանտարկված գրողը նախորդ տարվանից թուրքական բանտում է և դատապարտվել է երկու տարվա ազատազրկման: Պոլսահայ ազատամարտիկ, վերլուծաբան Սարգիս Հացպանյանը Նիշանյանի բանտարկությունը համարում է Թուրքիայի կողմից իրականացված հատուկ քայլ:

«Նիշանյանն այսօր միակ հայ քաղաքական բանտարկյալն է Թուրքիայում: Նրան բանտարկել են, որպեսզի 2015 թվականին ընդառաջ նրա ձայնը լսելի չլինի: Սա մեր առաջին ժողովն է, որի ընթացքում մենք հանրությանը կծանոթացնենք Սևան Նիշանյանին, քանի որ նաև գրողներից շատ քչերն են ճանաչում նրան: Նիշանյանի առավելությունները պետք է գնահատվեն ըստ արժանվույն»,- նշեց Սարգիս Հացպանյանը:

Հացպանյանն ընդգծեց, որ Նիշանյանի դեմ կայացրած անարդար վճիռը պայմանավորված է նաև իսլամի վերաբերյալ իր արտահայտած մտքերով: Այս որոշումը ստվեր է գցում խոսքի ազատության վրա: «Թուրքիայում քաղաքակրթության ջահը տարբեր ժամանակներում հենց հայ մարդն էր պահում»,- Նիշանյանի կենսագրությունը ներկայացնելիս' իր զեկուցման մեջ նշեց Սարգիս Հացպանյանը:

Վերլուծաբանը տեղեկացրեց, որ մոտ ժամանակներս հայերեն թարգմանությամբ լույս կտեսնեն Սևան Նէշանյանի գործերը, որոնց միջոցով հայ ընթերցողը հնարավորություն կունենա ծանոթանալ գրողի ժառանգությանը:

«Սևան Նիշանյանը փորձում էր մինչև 2015 թվականը Վանա լճի ափին կառուցել հայկական գյուղ, որպեսզի բոլորին ցույց տար' ահա սա է, որ թուրքերը սպանեցին: Այս փաստն առաջին անգամ է նշվում: Սևանը …իրոք տաղանդ է, մեծ հայորդի: Հավանականություն կա, որ նրան երկու տարուց երկար պահեն, ուստի նա չպետք է մենակ մնա, և մենք պետք է սատարենք նրան»,- հավելեց Հացպանյանը և կոչ արեց ՀԳՄ ղեկավարությանը Սևան Նիշանյանին աջակցելու պատրաստակամություն հայտնել և ինչ-որ կերպ օգնել նրան:

Թուրքիայում բնակվող հայազգի լեզվաբան, գրող, լրագրող, հրապարակախոս Սևան Նիշանյանը ծնվել է 1956 թվականին Կոստանդնուպոլսում: Նախնական կրթությունն ստացել է Պոլսի Պանգալթը թաղամասի հայկական Մխիթարյան վարժարանում: Սովորել է ԱՄՆ Յելի և Կոլումբիայի համալսարաններում: Աշխարհի տարբեր երկրներում գտնվելով' իր հուշագրությունները հանձնել է թղթին և գրքեր է հրատարակել: 1996 թվականին հաստատվել է Շիրինջե գյուղում, հիմնել հյուրանոց:

Բանտարկման առիթ է հանդիսացել այն հանգամանքը, որ նա իր հողամասում կառուցել է մեկ հարկանի մի տնակ, որը համարվում է «ապօրինի շինարարություն»: Թուրքական դատարանը Սևան Նիշանյանին 2013 թվականի դեկտեմբերի 12-ին դատապարտել է երկու տարվա ազատազրկման: Նա դեռ բանտում է: Վերջերս սկսվել է ստորագրահավաք` Նիշանյանի բանտային պայմանները բարելավելու և նրա դեմ տեղի ունեցող ճնշումները դադարեցնելու նպատակով: Ստեղծվել է imza.la կայքը, որտեղ ցանկացողները կարող են միանալ ստորագրահավաքին և փորձել օգնել լեզվաբանին: Հիմնվել է նաև Սևան Նիշանյանին աջակցող կոմիտե: