Երկրաշարժի վտանգ չկա. օդերևութաբան

Ջերմաստիճանի անոմալ բարձրացումը որևէ կապ չունի երկրաշարժի առաջացման հետ: Այս մասին այսօր` լրագրողների հետ հանդիպման ժամանակ նշեց ԱԻՆ Հիդրոմետ ծառայության պետի տեղակալ Գագիկ Սուրենյանը: «Մեզ մոտ հատուկ գիտական լայնածավալ ուսումնասիրություններ են կատարվել ու կապը, թե ջերմաստիճանի անոմալ բարձրացումը կարող է բերել երկրաշարժի, զրո է, այսինքն' որևէ կապ գոյություն չկա մթնոլորտային երևույթների և երկրաբանական գործընթացների միջև: Այդ մտավախությունը մեր հասարակության մեջ առաջացել է այն պատճառով, որ 1988 թվականի ավերիչ երկրաշարժի օրը գրանցվել է անոմալ տաք եղանակ: Այդպես մարդկանց մեջ տպավորվել է, որ եթե տարվա տվյալ ժամանակահատվածի համեմատ ջերմաստիճանը նորմայից բարձր է, դա կարող է բերել երկրաշարժի: Գիտականորեն նման կապ գոյություն ունենալ չի կարող»,-ասաց Գագիկ Սուրենյանը:

Այս տարվա փետրվարի 10-ից մինչև այսօր հանրապետությունն անդադար գտնվել է հարավից ներթափանցող արևադարձային տաք օդային հոսանքների ներքո, որի պատճառով ջերմաստիճանը 6-10 աստիճանով բարձր է եղել նորմայից: Հատկապես բարձր ջերմաստիճաններ են գրանցվում Սյունիքի հովիտներում' 22-23 աստիճան, Արարատյան դաշտում օդը տաքանում է մինչև 18-20 աստիճան: