«Ջազի սրբազան հրեշը» խոստովանեց, որ սիրում է հայ ունկնդրին

«Ջազի սրբազան հրեշը» Հայաստանում է: Ֆրանսիացի հայտնի ակորդեոնահար Ռիչարդ Գալիանոն մարտի 8-ին ընդառաջ հայ կանանց երկու աննկարագրելի համերգ կնվիրի: Ակորդեոնահարը մարտի 4-ին հանդես կգա «Մեցցո» ակումբում, իսկ հաջորդ օրը «Արամ Խաչատրյան» համերգասրահում ելույթ կունենա Հայաստանի պետական կամերային նվագախմբի հետ' իր ընկեր, նվագախմբի գլխավոր դիրիժոր և գեղարվեստական ղեկավար Վահան Մարտիրոսյանի հետ:

«Երկու պատճառ կա, թե ինչու եմ ես Հայաստանում: Նախ' շատ եմ սիրում հայ երաժշտասերին, բացի այդ առիթը բազմաթիվ տարիների կապն է Վահան Մարտիրոսյանի հետ»,-նշեց Ռիչարդ Գալիանոն:

ՀՊԿՆ գեղարվեստական ղեկավար և գլխավոր դիրիժոր Վահան Մարտիրոսյանը` խոսելով համատեղ համերգի մասին, նշեց, որ հայ ունկնդրի համար հետաքրքիր ծրագիր է պատրաստված: «Համերգը կրում է «Տարվա եղանակներ» խորագիրը: Ծրագրում կհնչեն կոմպոզիտորներ Անտոնիո Վիվալդիի և Աստոր Պիացոլայի «Տարվա եղանակները», ինչպես նաև Ռիչարդ Գալիանոյի ստեղծագործությունները: Պիացոլան իր գործը գրել էր' իմանալով, որ Վիվալդին «Տարվա եղանակներ» անվանումով ստեղծագործություն ունի: Այս համերգը կարծես դասական և ժամանակակից ժամանակակից կոմպոզիտորների երկերի միաձուլում է մեկ ծրագրում»,-նշեց Վահան Մարտիրոսյանը:

ՀՊԿՆ գեղարվեստական ղեկավարն ընդգծեց, որ Ռիչարդ Գալիանոյի հետ համագործակցում է արդեն մի քանի տարի: «Ֆրանսիայում միասին շատ ենք ելույթ ունեցել, բեմի վրա լավ ենք զգում, իրար հետ լեզու ենք գտնում: Նույնիսկ շատ քիչ փորձերով կես խոսքից հասկանում ենք իրար»,-նշեց Մարտիրոսյանը:

Ռիչարդ Գալիանոն, պատասխանելով հայ լրագրողների հարցերին, ընդգծեց, որ Աստոր Պիացոլայի հետ ընկերությունը և համագործակցությունը նրա համար շատ կարևոր էր: «Պիացոլան ինձ տվեց հնարավորություն իրականացնելու այն ամենն, ինչ ես ունեմ այսօր, բացի ուսուցիչ լինելուց, նա նաև իմ ընկերն էր: Նա ինձ տվեց ազատություն' նվագելու այն, ինչ ուզում եմ և այստեղ ես ևս այդպես եմ անելու»,- նշեց աշխարհահռչակ ակորդեոնահարը: Գալիանոն նշեց, որ համագործակցել է նաև Շառլ Ազնավուրի հետ: «Ազնավուրի հետ 25 տարի առաջ եմ համագործակցել, «Ապրել քեզ համար» երգն ենք ստեղծել, ինչպես նաև աշխատել ենք «Ջազնավուր» ձայնասկավառակի ստեղծման վրա»,-հավելեց երաժիշտը:

Հարցին, թե արդյոք հասցրե՞լ է ճանաչել հայ կանանց, Գալիանոն կեսկատակ, կեսլուրջ պատասխանեց. «Դեռևս բախտ չեմ ունեցել ճանաչել հայ կանանց, ամուսնացած եմ 37 տարի և հավատարիմ ամուսին եմ, բայց համերգը կարող ենք նվիրել նրանց»,-պատասխանեց Գալիանոն:

ՀՊԿՆ գեղարվեստական ղեկավար և գլխավոր դիրիժոր Վահան Մարտիրոսյանը պատրաստվում է Գալիանոյին ծանոթացնել հայ կոմպոզիտորների ստեղծագործություններին: Շուտով աշխարհահռչակ երաժշտի ակորդեոնով կհնչեն Կոմիտասի գործերը: Մարտիրոսյանը խոստացավ' Գալիանոյի հետ համագործակցությունը շարունակական կլինի:

Իտալական ծագումով ֆրանսիացի ակորդեոնահար, Աստոր Պիացոլայի մեկնաբան, կոմպոզիտոր Ռիչարդ Գալիանոն ծնվել է Ֆրանսիայում 1950-ին: Դաշնամուր և ակորդեոն սկսել է նվագել 4 տարեկանից: Առաջին ուսուցիչը հայրն էր' ակորդեոնահար Լյուսիեն Գալիանոն: Այնուհետև երաժշտական ուսումը շարունակել է Նիցցայի կոնսերվատորիայում: Ուսմանը զուգահեռ մասնակցել է ակորդեոնահարների միջազգային մրցույթների և երկու տարի անընդմեջ' 1966-67 թվականներին այդ մրցույթներում զբաղեցրել առաջին տեղը:1973-ին Գալիանոն հարավային Ֆրանսիայից տեղափոխվում է Փարիզ և մի քանի տարի համագործակցում Կլոդ Նուգարոյի նվագախմբի հետ' որպես դիրիժոր, գործիքավորող և կոմպոզիտոր: Համագործակցում է նաև Շառլ Ազնավուրի, Զիզի Ժարմե նի և այլոց հետ: 1983-ին, Աստոր Պիացոլայի նախաձեռնությամբ, Ռիչարդ Գալիանոն հրավիրվում է Կոմեդի Ֆրանսեզ, որտեղ հանդես է գալիս որպես բանդոներահար, այնուհետև նաև գործիքավորող և կոմպոզիտոր: 1991-ին Գալիանոն ստեղծում է «նոր մյուզետ» ոճը և այս ոճով ձայնագրում է ալբոմ: