Նախորդ տարի քրեական գործերը 5 տոկոսով նվազել են

Հայաստանում դատարան ստացված քրեական գործերը 2013 թվականին 2012-ի համեմատությամբ նվազել են, միևնույն ժամանակ աճել են քաղաքացիական, վարչական, վճարման կարգադրությունների գործերը: Այս են վկայում ՀՀ դատարանների 2012-2013 թթ. գործունեության վերաբերյալ համեմատական վիճակագական վերլուծության արդյունքները, որոնք ներկայացրեց ՀՀ դատական դեպարտամենտի միջազգային համագործակցության և հասարակայնության հետ կապերի ծառայության պետ Արսեն Բաբայանը: «Դատարան ստացված քրեական գործերի մասով նվազում է գրանցվել, իսկ քաղաքացիական, վարչական, վճարման կարգադությունների և մյուս գործերով աճ է նկատվել, ինչպես նաև աճ է նկատվել վերաքննիչ դատարաններում բողոքարկումների գործերի մասով»,-ասաց Արսեն Բաբայանը' հավելելով, որ ավելացել են նաև արդարացումները, պատժի պայմանական չկիրառելու դատական ակտերը:

Քրեական գործերի մասով նվազումն Արսեն Բաբայանը բացատրում է Վճռաբեկ դատարանի կողմից ընդունած նախադեպային որոշումներով, որոնք ազդել են նաև հետագա կատարված արարքների որակման վրա: «Եթե վերցնենք, օրինակ, խուլիգանության հանցատեսակով 40 տոկոս նվազում է գրանցվել 2013-ին, դրանց մեջ կան նաև քրեական գործեր, որոնք տեղում վարույթ իրականացնող մարմնի կողմից կարճվել են' համապատասխան վճռաբեկ դատարանի որոշման»,-նշեց Արսեն Բաբայանը:

Նրա խոսքով` ինչպես վստահության աճ է գրանցվել դատական մարմինների նկատմամբ, այնպես էլ բարձրացել է քաղաքացիների իրավագիտակցության մակարդակը: «Իրավաբանական անձ-պետություն, քաղաքացի-պետություն հարաբերություններում ավելի շատ իրավագիտակցությունն է բարձրացել, և քաղաքացիներն իրենց իրավունքները պաշտպանելու արդյունավետ հիմնական ուղիների մասին տեղեկացված են»,-փաստեց Արսեն Բաբայանը:

Ներկայացված տվյալների համաձայն, 2013 թվականի ընթացքում ՀՀ առաջին ատյանի դատարաններում ստացվել են 4039 քրեական, 48 հազար 540 քաղաքացիական, 24 հազար 893 վարչական գործեր, 58 հազար176 վճարման կարգադրություն արձակելու և 3 հազար 376 սնանկության դիմումներ, մինչդատավարական վարույթի նկատմամբ դատական վերահսկողության ոլորտին ու դատական ակտի կատարման հետ կապված հարցերին վերաբերող 17 հազար 777 միջնորդություն: Ստացված 4 հազար 39 քրեական գործից ավարտվել է 3 հազար 204-ը, այսինքն' 79.3 տոկոսը:

Դատարաններում ստացված և ավարտված գործերի համեմատությունը ցույց է տալիս, որ 2013-ին, 2012-ի համեմատությամբ, քրեական գործերը նվազել են 4.9 տոկոսով կամ 207 գործով: Դատապարտված անձանց թիվը նվազել է 6.6 տոկոսով, աճել է արդարացված անձանց թիվը' ամբողջովին կամ մասնակի արդարացված անձանց թիվը աճել է 14.3 տոկոսով, 7.3 տոկոսով աճել է այն անձանց թիվը, որոնց նկատմամբ դատարանները պատիժը պայմանականորեն չեն կիրառել:

2013 թվականին 14.5 տոկոսով նվազել է գողությունների, 45.5 տոկոսով խուլիգանության, 25.6 տոկոսով սպանությունների համար դատապարտվածների թիվը: