Եռաբլուրում մենք բոլորս հավասար ենք. Սեյրան Օհանյան (տեսանյութ)

Այսօր Եռաբլուրում` Սպարապետ Վազգեն Սարգսյանի հիշատակին, հարգանքի տուրք մատուցելու էր եկել Պաշտպանության նախարար Սեյրան Օհանյանը: Վերջինս նշեց, որ Սպարապետի կերպարն այսօր հավաքական է, և նրա շնորհիվ ենք կարողացել պայքարի հանել երկրապահներին:

Ողջունելով հավաքվածներին՝ ՀՀ պաշտպանության նախարար Սեյրան Օհանյանը նշեց, որ հայ ժողովրդի նորօրյա պատմության ամբողջ նկարագրությունը խոսում է այն մասին, որ մենք ինչպես մեր ողջ պատմության տարբեր ժամանակահատվածներում, այնպես էլ այսօր պայքարով ենք պահում մեր անկախությունը և ազատ ապրելու իրավունքը: «Եվ այսօր չափազանց խորհրդանշական օր է մեզ համար: Խորհրդանշական այն առումով, որ մենք նշում ենք սպարապետ Վազգեն Սարգսյանի 55-ամյակը: Այսօր մենք գերադասել ենք ոչ թե կահավորված դահլիճում մեծարանքի խոսքեր ասել մեր սպարապետի և մեր մարտիկների հասցեին, այլ գտնվել Եռաբլուրում, որովհետև մենք այստեղ բոլորս հավասար ենք և կարող ենք մեր սրտի խոսքն ասել»,- նշեց Օհանյանը:

Սեյրան Օհանյանը նշեց, որ անգնահատելի է Վազգեն Սարգսյանի դերակատարությունը հայ ժողովրդի անկախությունն ու ազատությունն ապահովելու գործում: «Վազգեն Սարգսյանն այն անհատներից էր, ում նվիրումի, սկզբունքայնության, չափազանց մեծ պատասխանատվության շնորհիվ մենք կարողացանք պայքարի հանել մեր ազատամարտիկներին, ստեղծել Երկրապահ կամավորականների միություն, որի հավերժ նախագահն է նա հանդիսանում, և կադրային սպաների հետ ստեղծել հայկական բանակը: Բանակ, որի կազմավորումն սկսվեց պայքարի հետ զուգընթաց, որը հաղթանակ տարավ»,- ասաց Օհանյանը:

Վազգեն Սարգսյանի կերպարը, ըստ Սեյրան Օհանյանի, այսօր հավաքական է երկրապահների, ազատամարտիկների, բոլոր կռվող տղաների և բանակի զինծառայողների մտապատկերում: «Եռաբլուրում մենք բոլորս հավասար ենք: Այսօր մենք նաև հաշվետվություն ենք տալիս և՛ Վազգեն սպարապետին, և’ մեր մարտական ընկերներին, որ երկրապահներն ու բանակի ողջ անձնակազմն այսօր էլ միասին են, որովհետև առօրյա մարտական պատրաստության և երկրապահ կամավորների ռազմական փորձի շնորհիվ մենք կարող ենք ստեղծել մի այնպիսի բարոյահոգեբանական մթնոլորտ, որը կարող է մարտունակ վիճակում պահել հայկական բանակը: Շնորհավոր հոբելյանդ, Սպարապե՛տ»,- եզրափակեց նախարարը:

Մանրամասները` տեսանյութում: