Գյուղատնտեսության նախարարությունը գյուղացիներին գարնանացան սերմացուն տալիս է ավելի էժան

Հայաստանի Հանրապետության կառավարությունը 40-45 տոկոսով նվազեցրել է գյուղացիներին տրամադրվող գարնանացան մշակաբույսերի սերմացուների գները, որպեսզի նրանց հարմար լինի դրանք ձեռք բերելը: Այդ մասին մարտի 5-ին հրավիրած ասուլիսում հայտնեց ՀՀ գյուղատնտեսության փոխնախարար Սամվել Գալստյանը: «Գարնանացան գարու սերմացուն կտրամադրվի մեկ կիլոգրամը 200 դրամով, առվույտի սերմնացուն 1500 դրամով, եգիպտացորենի սերմացուն 350 դրամով, կորնգանինը՝ 370 դրամով: Սրանով կառավարությունը 40-45 տոկոսով ներկրված սերմացուների արժեքները նվազեցրել է, որպեսզի գյուղացիական տնտեսությունները կարողանան ավելի մատչելի գներով իրականացնել սերմացուների ձեռքբերումը», - նշեց Գալստյանը:

Հայաստանի Հանրապետության կառավարությունը սուբսիդավորում է գյուղացիական տնտեսություններին տրամադրվող դիզվառելիքը և պարարտանյութը: Այս տարի դիզվառելիքի մեկ լիտրը գյուղացիական տնտեսություններին հատկացվում է 350 դրամով, ազոտական պարարտանյութի 50 կիլոգրամանոց պարկը՝ 6 հազար դրամով, իսկ կալիումական և ֆոսֆորական պարարտանյութերի 1 պարկը՝ 7 հազար դրամով: