Հակադիր կարծիքներ` Ուկրաինայում տեղի ունեցող իրադարձությունների վերաբերյալ

Ուկրաինայում տեղի ունեցող իրադարձությունները սոցիոլոգ Ահարոն Ադիբեկյանին հիշեցրել են 1992 թ. Հայաստանը, երբ իշխանության եկած «Ղարաբաղ» կոմիտեի նպատակը ոչ թե երկիրը զարգացնելն էր, այլ քանդելը և Ռուսաստանը հիշեցնող ցանկացած կառույց տապալելը: Ադիբեկյանը հիշեցնում է, որ 90-ականներին' «Ղարաբաղ» կոմիտեի իշխանության ժամանակաշրջանում փակվեց շուրջ 1000 գործարան, 250 ռազմարդյունաբերական նշանակության կառույց, գիտահետազոտական կենտրոններ: Սոցիոլոգը հավաստիացնում է, որ նույնն այսօր կատարվում է Ուկրաինայում, և իշխանության եկած ուժերի նպատակը ոչ թե երկրի զարգացումն է, այլ Ուկրաինայի մեկուսացումը Ռուսաստանից:

«Հատկապես ռազմարդյունաբերական ոլորտներում Ռուսաստանն ու Ուկրաինան սերտ համագործակցում են, և Ռուսաստանի մեկուսացումից հետո երկիրը կընկնի տնտեսական կոլապսի մեջ»,-ասաց Ադիբեկյանը' հավելելով, որ թեպետ վերջին օրերին հակառուսական կոչերի նվազում է առկա, սակայն կարգախոսները շարունակում են մնալ նույնը:

«Ժառանգություն» կուսակցութան ներկայացուցիչ Ստյոպա Սաֆարյանի ներկայացմամբ` առանց Ռուսաստանից մեկուսանալու էլ Ուկրաինան տնտեսական ճգնաժամի եզրին էր: Նրա կարծիքով` դեռևս նախորդ տարի էր Ուկրաինան հայտնվել սնանկացման եզրին, և նոր կառավարությունն իրականում ձեւավորվեց Յանուկովիչի ապաշնորհ ղեկավարման հետևանքով:

«Ուկրաինան ստացել է իրավիճակը փոխելու հնարավորություն, և դրանից հրաժարվելը շատ սխալ է»,-ասաց Սաֆարյանը' հավելելով, որ միջազգային կազմակերպություններն Ուկրաինային աջակցելու որոշումներ են արդեն կայացնում: Նա նշեց, թե ԱՄՆ-ն հայտարարել է, որ Ուկրաինային կտրամադրի 1 մլրդ դոլար, իսկ Արժույթի միջազգային հիմնադրամը քննարկում է տրամադրվելիք օգնության չափը: «Սա կօգնի Ուկրաինային ոտքի կանգնել»,-ասաց Սաֆարյանը, ինչին ի պատասխան Ադիբեկյանը նշեց, որ Հայաստանում առավելապես պետք է մտահոգվեն Ղրիմի իրավիճակով: Ըստ սոցիոլոգի` Ղրիմի անկախություն ստանալը կարող է նախադեպային լինել նաև Լեռնային Ղարաբաղի հարցում, և հետագայում ԼՂՀ-ն էլ կստանա անկախություն: Սոցիոլոգի վերջին հայտարարության վերաբերյալ Սաֆարյանն ասաց, որ համամիտ չէ և չի կարծում, որ դրանք պետք է մեկ հարթակում քննարկել:

Ուկրաինայում իրավիճակը շարունակում է թեժ մնալ: Իրադարձությունները Մայդանից տեղափոխվել են Ղրիմ: Ռուսական կողմն այնտեղ զորք է տեղակայում, իսկ միջազգային հանրությունը խիստ դատապարտել է Ուկրաինայում խնդիրների կարգավորման ռազմական լուծումը: