Իշխանության գալու համար ընդդիմությունը պետք է կարողանա արդյունավետ համագործակցել ժողովրդի հետ. Գալուստ Սահակյան

Հայաստանում հասարակության մեջ իշխանափոխություն իրականացնելու ցանկություն չի նկատվում: Մարտի 6-ին լրագրողների հետ հանդիպմանը նման կարծիք հայտնեց ՀՀԿ խմբակցության ղեկավար Գալուստ Սահակյանը: «Իսկ երկրում խաղաղ իշխանափոխություն իրականացնելու համար, ինչի մասին խոսում է Լևոն Տեր-Պետրոսյանը, միակ ճանապարհն ընտրություններն են»,-նշեց Սահակյանը:

Գալուստ Սահակյանի խոսքով` ընտրություններում հաղթելու համար ոչ թե պետք է ցույցեր հրավիրել և քաղաքացիներին օգտագործել ներքաղաքական նպատակների համար, այլ գնալ գյուղեր, հանդիպել մարդկանց հետ, համոզել, որ իրենց ծրագրերն ավելի լավ և ավելի համոզիչ են: «Ես հույս ունեմ, որ մեր երկրում ընդդիմությունը կկարողանա այնպես կազմակերպվել, որ մենք ի վերջո ունենանք կառուցողական ընդդիմություն, թե չէ հիմա ընդդիմությունը, իշխանության գալուց բացի, այլ բանի չի ձգտում»,-ասաց Սահակյանը: Նա նշեց, որ ընդդիմությունը պետք է կարողանա գործել, իսկ եթե ցանկանում է նաև իշխել, պետք է գա իշխանության, ինչի համար պետք է կարողանա ճիշտ համագործակցել ժողովրդի հետ: Հարցին, թե 2018թ. նախագահական ընտրություններից հետո հնարավո՞ր է, որ ԲՀԿ-ն կրկին ակտիվանա, թե՞ ՀՀԿ-ն կրկին կչեզոքացնի ԲՀԿ-ին, Գալուստ Սահակյանը նշեց, որ ինչպես ԲՀԿ-ն, այնպես էլ ցանկացած կուսակցություն ընտրություններից առաջ պետք է ակտիվանա: «Հանրապետական կուսակցությունը ոչ մեկին չի չեզոքացնում, եթե նրանք չեն չեզոքանում: Մենք ուղղակի մրցակցում ենք»,-ասաց Սահակյանը:

Հարցին, թե 2018թ. նախագահական ընտրություններում ո՞վ կլինի ՀՀԿ թեկնածուն, Սահակյանը պատասխանեց, որ այդ մասին չեն մտածում, քանի որ դեռ երկար ժամանակ կա, իսկ երկրի նախագահը հաջողությամբ կառավարում է երկիրը:

Անդրադառնալով հարցին` թե ժողովուրդը դժգո՞հ է իշխանություններից, Սահակյանը նշեց, որ բոլոր երկրներում էլ ժողովուրդը դժգոհում է, և դա բնական է: Նա նշեց, որ երկրում առկա խնդիրների մասին առաջին հերթին բարձրաձայնում են հենց իշխանությունները և փորձում են լուծում տալ դրանց: